गोंदिया : वाहनांच्या पार्किंगसाठी शहरातील अग्रसेन भवनाजवळ कोट्यवधी रुपये खर्चून पार्किंग प्लाझा उभारण्यात आला. याला दोन वर्ष लोटली. तरीही प्लाझाच्या उद्‌घाटनाचा मुहूर्त अद्याप निघाला नाही. त्यामुळे आजही वाहने रस्त्यावरच पार्किंग केली जातात. त्यामुळे दररोज वाहतूक कोंडीचा फटका बसत आहे. येत्या 15 दिवसांत ही समस्या निकाली न काढल्यास आम्ही पार्किंग प्लाझाचे उद्‌घाटन करू, असा इशारा एनएसयूआय, शहर कॉंग्रेस व जिल्हा युवक काँग्रेसने दिला आहे.

शहरातील लोकसंख्येच्या मानाने चारचाकी, दुचाकी वाहनांची संख्या दुप्पट, तिप्पट आहे. प्रमुख चौकात दररोज वाहनांची मोठी वर्दळ असते. सायंकाळच्या सुमारास वाहतूक कोंडीला अनेकांना सामोरे जावे लागते. बाजारपेठ परिसरात प्रत्येक 2 मिनिटांनी वाहतूक विस्कळीत होत असते. ही वाहतूक सुरळीत होण्यासाठी 15 ते 20 मिनीटांचा वेळ वाया जातो. कधीकाळी अपघातही होतात. या सर्व प्रकारावर आळा बसावा, शहरातील वाहतूक व्यवस्था सुरळीत व्हावी, यासाठी येथील शहर पोलीस ठाण्याच्या मागे असलेल्या अग्रसेन भवनाजवळ पार्किंग प्लाझा उभारण्यात आला. यासाठी 7 कोटी 80 लाख रुपये खर्च झाल्याचा अंदाज आहे. बांधकाम होऊन दोन वर्षे लोटली. तरीही प्लाझाच्या उद्‌घाटनाचा मुहूर्त अद्याप निघाला नाही. लालफितशाहीत उद्‌घाटन सोहळा अडकल्याचे बोलले जात आहे. व्यापारीदेखील यामुळे त्रस्त आहेत. 

हेही वाचा - शाळेचे विद्यार्थीच झाले मुख्याध्यापक, गणित विषयातही तज्ज्ञ

दरम्यान, कोरोना विषाणूच्या पार्श्‍वभूमीवर लावण्यात आलेले लॉकडाउन हळूहळू हटविण्यात आले. अनलॉक सुरू आहे. शहरातील नागरिक कामानिमित्त बाहेर पडताना दिसत आहेत. मात्र, वाहतूक विस्कळीत झालेल्या ठिकाणी सोशल डिस्टंसिंग कुठेही दिसून येत नाही. त्यामुळे बाजारपेठेत खरेदीसाठी येणाऱ्या नागरिकांच्या मनात भीती आहे. व्यापाऱ्यांचेही मोठे नुकसान होत आहे. तथापि, दोन वर्षांपासून लालफितशाहीत अडकलेल्या पार्किंग प्लाझाचे येत्या 15 दिवसात लोकार्पण करावे, अन्यथा आम्ही पार्किंग प्लाझाचे उद्‌घाटन करू, असा इशारा एनएसयूआय, शहर काँग्रेस व जिल्हा युवक काँग्रेसने दिला आहे.

काँग्रेसने राबविले स्वाक्षरी अभियान -
पार्किंग प्लाझा सुरू करण्याबाबत प्रदेश काँग्रेसचे सचिव विनोद जैन, अमर वराडे यांच्या मार्गदर्शनात काँग्रेसच्या पदाधिकाऱ्यांनी स्वाक्षरी अभियान राबविले. यात शेकडो व्यापाऱ्यांनी पार्किंग प्लाझाच्या समर्थनार्थ स्वाक्षऱ्या केल्या. या अभियानात दिनेश कोठारी, अभिषेक जैन, अहमद सय्यद, नियाज शेख सहभागी झाले होते.

हेही वाचा - सहस्त्रकुंड धबधब्यात तीन महिला बुडाल्या; दोघींना वाचवण्यात यश; एक बेपत्ता

मुख्याधिकाऱ्यांना दिले निवेदन -
येत्या 15 दिवसांत पार्किंग प्लाझा सुरू करण्यात यावा, अन्यथा आम्ही उद्‌घाटन करू, याबाबतचे निवेदन एनएसयूआय, शहर काँग्रेस व जिल्हा युवक काँग्रेसने नगर परिषदेचे मुख्याधिकारी करणकुमार चव्हाण यांना दिले. यावेळी शहर काँग्रेसचे अध्यक्ष जहीर अहमद, जिल्हा युवक काँग्रेसचे अध्यक्ष आलोक मोहंती, जिल्हा एनएसयूआयचे अध्यक्ष हरीश तुळसकर, अफसर खान, जिल्हा युवक काँग्रेसचे महासचिव जाहिद सोळंकी उपस्थित होते.