वर्धा : सावनेर येथील आनंद या युवकावर सावंगी मेघे रुग्णालयात यशस्वीरीत्या लिंगपरिवर्तन शस्त्रक्रिया करण्यात आली. आनंदचे परिवर्तन राजराजेश्वरीत झाले आहे. मी स्वतःची ओळख स्थापित करण्यासाठी लढली व शस्त्रक्रियेद्वारे माझ्या मूळ रूपात आले, या शब्दात राजराजेश्वरीने आनंद जाहीरपणे पत्रकारांजवळ व्यक्त केला.

नागपूर जिल्ह्यातील सावनेर येथील ३१ वर्षीय आनंदवर सावंगी मेघे येथील आचार्य विनोबा भावे ग्रामीण रुग्णालयात प्रथमच लिंगबदल शस्त्रक्रिया करण्यात आली. राजराजेश्वरी हे नवे नाव धारण करीत तिने माध्यमांशी संवाद साधला. ती म्हणाली, हे पुरुषी शरीर आपले नाही, याची जाणीव बालवयातच झाले होती. माझे मुलींसारखे वागणे घरीदारी सर्वांना खटकत होते. परंतु, समजून कोणीच घेत नव्हते. अखेर घर सोडले आणि धर्मस्थळांचा आधार घेतला.

सज्ञान झाल्यावर सामाजिक कार्यकर्त्यांच्या सान्निध्यात आले. वयाच्या तिशीनंतर मार्गदर्शक मिळाले. सावंगी मेघे रुग्णालयात योग्य उपचार मिळाले आणि शस्त्रक्रियेने मला माझी ओळख दिली. मी एका जन्मातून मुक्त होऊन माझ्या मूळ रूपात आले आहे, अशी ती म्हणाली. पत्रपरिषदेला शल्यचिकित्सक डॉ. यशवंत लामतुरे, प्लास्टिक सर्जन डॉ. विवेक सुपाहा, मानसोपचार विभाग प्रमुख डॉ. प्रदीप पाटील, जनसंपर्क अधिकारी संजय इंगळे तिगावकर, सामाजिक कार्यकर्त्या सविता पांडे, दीपक ओबेरॉय यांची उपस्थिती होती.