जेवनाळा (जि. भंडारा) : रूढी-परंपरांना मूठमाती देत दोन्ही मुलींनी जन्मदात्या आईच्या प्रेताला खांदा दिला. एवढेच नाहीतर मुलींनीच मुखाग्नी देत सर्व विधी पार पाडले आणि आपल्या आईची इच्छा पूर्ण केली आहे. तसेच मुलगा नाही म्हणणाऱ्या लोकांना त्यांनी सणसणीत उत्तर दिलं आहे.

भंडारा जिल्ह्यातील लाखनीजवळील पोहरा येथील रहिवासी रेखा सीताराम गिर्हेपुंजे (वय 53) या माऊलीचे वृद्धापकाळाने २२ ऑक्टोबरला रात्री निधन झाले. त्यात रेखाबाई यांना मुलगा नसल्याने खांदा कोण देणार, मुखाग्नी कोण देणार अशी चर्चा सुरू झाली. असं असताना लहान मुलगी मुखाग्नी देण्यासाठी पुढे आली. दोन्ही मुलींनी खांदा देण्याचे ठरविले. रेखाबाई यांच्या दोन मुली भावना आणि निशा, तसेच भाचे राहुल गिर्हेपुंजे, रमेश गिर्हेपुंजे यांनी खांदा दिला. अंत्ययात्रा निघताना पाणी, ताट घेऊन निशा मस्के अंत्ययात्रेसोबत स्मशानाकडे गेली. त्याठिकाणी गावातील मंडळी, नातेवाईक यांच्यासमोर रेखाबाई यांच्या प्रेतास अग्नी दिला. या घटनेमुळे गावात व आजूबाजूच्या परिसरात महिलांनी केलेल्या या कार्याचे सर्वत्र कौतुक केले जात आहे. संपत्ती, पैसा, घर, शेती यांचा उत्तराधिकारी पुरुष अशी असा समज मोडीत काढत या बहिणींनी आज नवा आदर्श निर्माण केला आहे.

मुलांपेक्षा मुली कमी नाहीत -

मुलगा नसेल तर मोक्ष प्राप्त होत नाही, पाणी कोण पाजणार? मुलाने मुखाग्नी दिला तरच उद्धार होतो, असे अनेक गैरसमज ग्रामीण भागात आहेत. याला छेद देत या दोन्ही मुलींनी आईचे अंत्यसंस्कार केला आहे. परंपरेची बंधन झुगारून धाडस दाखवणाऱ्या या बहिणीचे कौतुक होत आहे. तसेच मुलापेक्षा मुलगी देखील काही कमी नाही हे दाखवून देत सर्व जबाबदाऱ्या मुलींनी पार पाडल्या आहेत.