पवनार (जि. वर्धा) : भाचीचा वाढदिवस करून परत येत असलेल्या युवकांच्या दुचाकीला अज्ञात वाहनाने धडक दिली. यात दोघांचाही मृत्यू झाला. ही घटना वर्धा-अमरावती रोडवर बोरगाव (धांदे) शिवारात मंगरूळ दस्तगीर जवळ शुक्रवारी (ता. २५) रात्री नऊ वाजताच्या सुमारास घडली. रूपेश बंडू तिघरे (वय २९) व अक्षय श्रावण बोरकर (वय २३) दोघेही रा. पवनार, अशी मृतांची नावे आहेत. या घटनेमुळे पवनार येथे शोककळा पसरली आहे.

पोलिसांनी दिलेल्या माहितीनुसार, रूपेश तिघरे व अक्षय बोरकर हे दोघेही एमएच ३२ यू ९५७२ क्रमांकाच्या दुचाकीने रूपेशच्या भाचीच्या वाढदिवसाला गेले होते. कार्यक्रम आटपून घरी येत असताना अमरावती मार्गावर बोरगाव (धांदे) शिवारात मंगरूळ दस्तगीर जवळ अज्ञात वाहनाच्या भीषण धडकेत दोघांच्याही डोक्‍याला जबर मार बसला.

क्लिक करा - पोलिसांना झाले काय? वाहतूक पोलिस शाखेत एटीपीच्या नावाखाली वसुलीबाज युवक

यात अक्षय बोरकर याचा घटनास्थळीच मृत्यू झाला. तर रूपेश तिघरे गंभीर जखमी झाल्याने त्याला उपचारार्थ सावंगी रुग्णालयात दाखल करण्यात आले होते. येथे उपचारादरम्यान त्याचा मृत्यू झाला. रूपेश हा पानटपरी चालवीत होता. त्याला सहा महिन्याचा मुलगा आहे. तर अक्षय हा पेंटिंगचे काम करीत होता.

हे दोघेही कुटुंबातील एकुलते एक व कमवते होते. कमवत्या मुलांचा अपघाती मृत्यू झाल्याने कुटुंबीयांवर संकट कोसळले आहे. अपघातात दोन युवकांचा मृत्यू झाल्याने पवनारात शोककळा पसरली आहे. दुपारी दोन वाजताच्या सुमारास येथील स्मशानभूमीत अंत्यसंस्कार करण्यात आले.

अधिक वाचा - गावातील लहान मुले शेतात गेले अन दिसले दोन बिबटे; आरडाओरडा केला तेव्हा समोर आला विचित्र प्रकार

घटनास्थळावरून वाहन पसार

रूपेश आणि अक्षयच्या वाहनाला भीषण धडक देणारे अज्ञात वाहन धडक देताच घटनास्थळावरून पसार झाले. या धडकेत दोघांच्याही डोक्‍याला गंभीर इजा झाली. दोघेही बराचकाळ अपघात स्थळीच पडून राहिले. या धडकेत अक्षयचा जागीच मृत्यू झाला. मात्र, रूपेश खूप वेळ घटनास्थळी पडून राहिला. त्याला वेळीच मदत मिळाली नसल्याने त्याचा रुग्णालयात उपचारादरम्यान मृत्यू झाला.

पवनार येथे शोककळा

मुलांचा अपघाती मृत्यू झाल्याची घटना कळताच दोन्ही कुटुंबातील सदस्यांनी हंबरडा फोडला. घटनेची माहिती वाऱ्यासारखी पसरली. गावातील दोन्ही युवकांचा अपघाती मृत्यू झाल्याने परिसरात शोककळा पसरलेली आहे. या घटनेने संपूर्ण गावात स्मशानशांतता आहे.