अमरावती ः प्रसिद्ध नमकीनच्या कंपनीचा स्थानिक वितरक होण्याचे स्वप्न उराशी बाळगणाऱ्या युवकाने चुकीच्या वेबसाइटवर संपर्क साधला. त्यामुळे कंपनीच्या तोतया अधिकाऱ्याने त्या युवकाची 5 लाख 10 हजारांनी फसवणूक केली.

मंगेश सुरेश पारीसे (वय 20, रा. माळीपुरा, खोलापुरीगेट) असे फसवणूक झालेल्या युवकाचे नाव आहे. मंगेश हा किराणा व्यावसायिक आहे. त्याने मोठे स्वप्न उराशी बाळगले. व्यवसायात ऑनलाइन पद्धतीवर अनेकांचा भर असतो. त्यातही युवापिढी त्याकडे मोठ्या प्रमाणात आकर्षित होते. त्याला एका नामांकित ब्रॅण्डचा स्थानिक पातळीवरील वितरक व्हायचे होते. त्याकरिता मंगेशने गुगल वरून त्या कंपनीची वेबसाइट सर्च केली. त्यावर असलेल्या मोबाईल क्रमांकावर संपर्क साधला. 

हेही वाचा - संशय अखेर ठरला खरा; कोरोनाबाधितांसह मृत्यूच्या आकडेवारीतील घोळ सिद्ध

ज्या व्यक्तीसोबत संपर्क झाला त्याने कंपनीशी करारनामा करण्याच्या उद्देशाने मंगेशच्या व्हॉट्‌सऍपवर काही फॉर्म पाठविले. ते फॉर्म व आवश्‍यक दस्तऐवज मंगेशने भरून पाठविले. त्यानंतर व्हॉट्‌सऍप व ईमेल द्वारे मंगेशला एक पत्र प्राप्त झाले. हे पत्र वितरक होण्यासाठी तो पात्र ठरल्याचे त्यात नमूद होते. एवढ्या मोठ्या नामांकित कंपनीशी आपण जोडल्या गेल्याचा एक वेगळाच आनंद त्याच्या चेहऱ्यावर होता. 

संपर्क करणाऱ्या व्यक्तीने फॉर्म प्राप्त झाल्यानंतर मंगेशचा विश्‍वास संपादन केल्यावर नोंदणी, करार, इतर करासह अन्य वेगवेगळ्या नावाने सहा ते सात वेळा विविध कारणे सांगून पैसे भरण्यास सांगितले. त्यासाठी संपर्क करणाऱ्या व्यक्तीने मंगेशला कॅनरा बॅंक खात्याचा एक क्रमांक दिला होता. मंगेशने त्या बॅंकखाते क्रमांकावर चार वेळा रक्कम पाठविली. परंतु त्यावरही भागले नाही. म्हणून तोतयाने पुन्हा पैशाची मागणी केली असता, मंगेशने दुसऱ्यांदा तीन टप्प्यात पुन्हा काही रक्कम ऍपच्या माध्यमान पाठविली. 

24 सप्टेंबर ते 10 ऑक्‍टोबर 2020 या कालावधीत ही रक्कम मंगेश पारीसे याने भरली. परंतु त्याने संपर्क साधल्यावर खात्री न करता, ज्या वेबसाइटवर संपर्क साधला ती बनावट असल्याची बाब नंतर त्याच्या लक्षात आली. मंगेशने शहर सायबर ठाण्यात तक्रार केली असता, पोलिसांनी अज्ञात व्यक्तीविरुद्ध फसवणूकीचा गुन्हा दाखल केला.

नक्की वाचा - कर्जबाजारी झाल्यामुळे युवकाने केली आत्महत्या; मृत्यूपूर्वी मैत्रिणीला बोलावले होते भेटायला

ऑनलाइन आर्थिक व्यवहार करण्यापूर्वी खात्री करणे आवश्‍यक आहे. सायबर गुन्हेगार सक्रिय झालेत, त्याला आळा घालण्यासाठी सतर्कता ही महत्त्वाची आहे.
- रवींद्र सहारे,
 सहाय्यक पोलिस निरीक्षक, सायबर ठाणे.

संपादन - अथर्व महांकाळ