तिवसा( जि. अमरावती ) : जिल्ह्यातील गुरुदेवनगर निवासी वैद्यकीय अधिकाऱ्यावर अज्ञात हल्लेखोरांनी धारदार शस्त्राने प्राणघातक हल्ला केल्याची धक्कादायक घटना गुरुदेव आयुर्वेदीक रुग्णालयाच्या क्वार्टरमध्ये रात्री साडेबाराच्या सुमारास घडली. मनोज सांगळे, असे प्राणघातक हल्ला झालेल्या डॉक्टरचे नाव असून त्यांच्यावर सध्या अमरावतीमध्ये खासगी रुग्णालयात उपचार सुरू आहेत. दरम्यान, घटनेची माहिती मिळताच पोलिसांनी घटनास्थळी धाव घेत पंचनामा केला.  

हेही वाचा - आता हेल्मेट आणि कॉलेजबॅग बाळगणारे असणार पोलिसांच्या रडारवर; चेनस्नॅचिंगच्या घटना...

गुरुकुंज मोझरी मधील श्री गुरुदेव आयुर्वेदिक रुग्णालयामध्ये मनोज सांगळे हे गेल्या अनेक वर्षांपासून निवासी वैद्यकीय अधिकारी या पदावर कर्यरत आहे. नेहमीप्रमाणे शनिवारीही रुग्णालयातील काम संपल्यानंतर त्यांच्या खोलीमध्ये आराम करायला गेले. अशातच रात्री साडेबारा वाजण्याच्या सुमारास रुग्णालयाच्या मागील दरवाज्यातून हल्लेखोर आता शिरले. त्यानंतर त्यांच्यावर धारदार शस्त्राने जोरदार हल्ला चढविला आणि तिथून पळ काढा. हल्लेखोरांनी केलेला हल्ला इतका भयंकर होता की मनोज सांगळे हे रक्ताच्या थारोळ्यात पडले होते.

हेही वाचा - कारंजात जणू काही तासभर होता यमराजांचा मुक्काम; एकाच तासात तब्बल तीन अपघातात तिघांचा मृत्यू

अशातच त्यांनी त्या रुग्णालयातील कर्मचाऱ्याला फोन करून झालेल्या धक्कादायक प्रकाराची माहिती दिल्यानंतर डॉक्टर मजोज सांगळे यांना उपचारासाठी तात्काळ अमरावतीला रवाना करण्यात आले आहे.  सध्या अमरावती मधील एका खासगी रुग्णालयात त्यांच्यावर उपचार सुरू असून त्यांची प्रकृती चिंताजनक आहे . दरम्यान घटनेची माहिती मिळताच पोलिसांनी पहाटे चार वाजता घटनास्थळी धाव घेतली असून सध्या पोलिस आरोपींचा शोध घेत आहे.

हेही वाचा - काय सांगता! इथे चक्क बदकं देताहेत अनेकांना रोजगार; राज्यातील एकमेव पैदास केंद्र

राष्ट्रीय महामार्गावर असलेल्या गुरुदेव नगरात गेल्या 25 दिवसांत चार घरफोड्या झाल्याच्या घटना घडल्या, तर काल रात्री झालेल्या हल्ल्यामुळे परिसरात चांगलीच खळबळ उडाली आहे. परिसरातील एका सीसीटीव्हीमध्ये अज्ञात व्यक्ती कैद झाला आहे. त्यामुळे या परिसरातील प्रत्येक सीसीटीव्ही फुटेज तपासले जात आहे. याप्रकरणी पुढील चौकशी तिवसा पोलिस करत आहेत.