जामली, (जि.अमरावती) : शासनाने ग्रामीण भागात प्रत्येक ग्रामपंचायत स्तरावर सुरू केलेल्या महात्मा गांधी तंटामुक्त समित्या आज इतिहासजमा झाल्याचे दिसून येत आहे. पूर्वी या समित्यांमुळे गावातील अनेक समस्या, मिटविण्यात बरीच मदत मिळत होती. पण, आज या समित्या कार्यरत नसल्याने गावातील तंटे वाढू लागले आहेत. (villages tantamukti samiti in history)

गावपातळीवर तंटामुक्ती सदस्यांची निवड १५ ते ३० ऑगस्टच्या कालावधीत होणाऱ्या ग्रामसभेच्या माध्यमातून होत होती. परंतु, आता मात्र तंटामुक्त समित्यांमध्ये किती आणि कोण सदस्य आहेत याची पाटी कोरीच असल्याचे दिसून येते. शासन नियमानुसार प्रत्येक गावात ही समिती कार्यरत आहे. याबाबत अनेक गावांना तंटामुक्ती पुरस्कारही मिळाले आहेत. या समितीचा फलक ग्रामपंचायतीमध्ये लावणे बंधनकारक आहे.

परंतु, बऱ्याच ग्रामपंचायतींमध्ये समिती फलक कागदावरच असल्याचे दिसून येते. सोशल मीडियावर झालेला प्रसार, माहिती व तंत्रज्ञानाचा वापर यामुळे महिलांच्या संदर्भातील तंटे, गुन्हे याचे प्रमाण दिवसेंदिवस वाढत चालले आहेत. त्यामुळे तंटामुक्त समित्या पूर्ववत करण्याची गरज आहे. शासनाने पुन्हा एकदा नव्याने गावपातळीवर महात्मा गांधी तंटामुक्त योजनेबाबत जनजागृती करणे गरजेचे झाले आहे.

गावखेड्यात तंट्यांमध्ये वाढ

गावातील कोणताही तंटा मिटविताना तंटामुक्त समितीतील सर्व सदस्यांना तंटे मिटविण्यापूर्वी, तसेच तंटे मिटविण्याच्या जागी बोलविणे गरजेचे असते. अध्यक्ष सोडले तर इतर सदस्यांना याबाबत माहितीदेखील नसते. त्यामुळे सदस्यांत नाराजीचा सूर आहे. परिणामी गावखेड्यात तंट्यांमध्ये वाढ होत चालली आहे.

अनेक गावांमध्ये ‘तंटामुक्त गाव’ असे फलक आजही आहेत. परंतु, तंटामुक्त गाव समित्या अस्तित्वात नाहीत. गावागावांत तंट्यांमध्ये वाढ होत असून, कौटुंबिक कलहामुळे अनेक संसार उघड्यावर येत आहेत.

-बब्बू अजनेरिया, अध्यक्ष, पोलिस पाटील संघटना, चिखलदरा, जि. अमरावती