वर्धा : जिल्ह्यात कोरोनाचा प्रादूर्भाव वाढण्यासाठी पिपरी येथील लग्न कारणीभूत ठरले. या लग्नापूर्वी विनापरवानगीने केलेल्या मटणाच्या (कंदुरी) कार्यक्रमाला गेलेल्यांवर दंडाची टांगती तलवार आहे. या कार्यक्रमाला 70 ते 80 लोकांना आमंत्रित केले. त्यांचा शोध घेण्याचे काम प्रशासनातर्फे सुरू आहे. विभागीय अधिकाऱ्यांनी वर्धेच्या गटविकास अधिकाऱ्यांना या कार्यक्रमात सहभागी झालेल्यांचा तातडीने शोध घ्यावा, असे पत्र पाठविले आहे.
लग्नातून नवरदेव, नवरीसह सात जणांना कोरोनाची लागण झाली. तर या एका लग्नामुळे सहा ठिकाणी कंटेन्मेंट झोन निर्माण झाले आहेत. कोरोना संसर्गाच्या काळात शासनाकडून आपत्ती व्यवस्थापन कायदा अस्तित्वात आणला आहे. या काळात कार्यक्रमांना बंदी आहे. असे असताना पिपरी (मेघे) येथील एका व्यक्तीने नियमांचे उल्लंघन करीत विवाहाचे आयोजन केले होते. त्याचा विवाह जिल्ह्यात कोरोनाचा प्रादुर्भाव होण्यास कारण ठरल्याचे म्हणत त्याच्यावर आपत्ती व्यवस्थापण कायद्याचा भंग केल्याप्रकरणी गुन्हा दाखल करून 25 हजार रुपयांचा दंड ठोठावण्यात आला आहे.
सध्या वर्धा आणि आसपासच्या परिसरात कोरोनाबाधितांची संख्या वाढत आहे. जे रुग्ण पॉझिटिव्ह आढळत आहेत त्या सर्वांचा संबंध पिपरी येथील लग्नाशी येत असल्याचे दिसून आले आहे. केवळ वर्धेतच नाही तर आर्वी आणि देवळी तालुक्‍यातील व्यक्तीही या विवाहात सहभागी असून, त्यांनाही कोरोनाची लागण झाल्याचे पुढे आले आहे. त्यांच्यामुळे या भागातही कोरोनाचा उद्रेक झाला. यामुळे प्रशासनाने या नवरदेवावर गुन्हा दाखल करीत त्याला 25 हजार रुपयांचा दंड ठोठावला आहे.
या विवाहात परवानगीपेक्षा अधिक व्यक्ती आल्याने त्यांच्यावर कारवाई करण्यात आली आहे. एवढेच नाही तर त्याने कुठलीही परवानगी न घेता कंदुरीचा कार्यक्रम केला. यामुळे त्याला 25 हजार रुपयांचा दंड ठोठावण्यात आल्याचे प्रशासनाकडून सांगण्यात आले आहे.
यातही सध्याची स्थिती लक्षात घेता आमंत्रित असलेल्या व्यक्‍तींकडून कोणतेही नियम पाळण्यात आले नाही. यामुळे त्यांच्यावरही दंडात्मक कार्यवाही करण्यात येणार आहे.
नवरदेवावर दंडात्मक कारवाई
कोरोनापासून नागरिकांच्या बचावाकरिता सुरू असलेल्या शासनाच्या सर्वच प्रयत्नांवर पिपरी येथील एका लग्नाने पाणी फेरले. यामुळे या नवरदेवावर गुन्हा दाखल करण्यात आला आहे. तर त्याच्या कंदुरीच्या कार्यक्रमात सहभागी होणाऱ्या व्यक्तींचा शोध घेत त्यांच्यावरही दंडात्मक कारवाई करण्यात येणार आहे.
सुरेश बगळे, उपविभागीय अधिकारी, वर्धा
संपादन : अतुल मांगे
सकाळ+ चे सदस्य व्हा
ब्रेक घ्या, डोकं चालवा, कोडे सोडवा!
शॉपिंगसाठी 'सकाळ प्राईम डील्स'च्या भन्नाट ऑफर्स पाहण्यासाठी क्लिक करा.
Read latest Marathi news, Watch Live Streaming on Esakal and Maharashtra News. Breaking news from India, Pune, Mumbai. Get the Politics, Entertainment, Sports, Lifestyle, Jobs, and Education updates. And Live taja batmya on Esakal Mobile App. Download the Esakal Marathi news Channel app for Android and IOS.