यवतमाळ : जिल्हा परिषदेच्या अखत्यारित येणाऱ्या प्रकल्पांमधील आरक्षित पाणी वाटप झाले आहे. मात्र, या पाण्याची पाणीपट्टी अजूनही भरण्यात आली नाही. गेल्या दहा वर्षांपासून पाणीवाटपाची पाणीपट्टी थकीत असून, ही रक्कम तब्बल २१ कोटी रुपयांहून अधिक झाली आहे. दरम्यान, या थकीत पाणीपट्टीमुळे प्रशासनासमोरील अडचणींत वाढ झालेली आहे. 

जिल्ह्यात सरासरीच्या तुलनेत चांगला पाऊस होतो. असे असतानाही अनेक भागांना उन्हाळ्यात पाणीटंचाईचा सामना करावा लागतो. पाणीटंचाई कमी करण्यासाठी जिल्हा परिषदेच्या अखत्यारित येणाऱ्या प्रकल्पांतील पाणी पिण्यासाठी आरक्षित केले जाते. मागणी व गरजेनुसार हे पाणी संबंधित गावाला दिले जाते. आरक्षित करून ठेवलेल्या पाण्याची पाणीपट्टी मागणी करणाऱ्या संस्थेने नियमित भरणे गरजेचे आहे. मात्र, संबंधित संस्था पाणीपट्टी भरण्यास तयार राहत नाहीत. 

हेही वाचा - नवी इमारत असून वसतिगृह किरायाच्या खोलीत, पाण्याची सोयच नसल्याने करायचे काय?

गेल्या दहा वर्षांपासून पैनगंगा, वाघाडी प्रकल्पाचे आरक्षित पाण्याची पाणीपट्टी संबंधित ग्रामपंचायतींनी भरलीच नसल्याची धक्कादायक बाब समोर आली आहे. पैनगंगा प्रकल्पाचे जवळपास २० कोटी, पाटबंधारे विभागाचे ९० लाख, असे जवळपास २१ कोटी रुपयांची पाणीपट्टी थकीत आहे. थकलेली पाणीपट्टी वसूल न केल्यामुळे संबंधित विभागाला प्रचंड अडचणींना तोड द्यावे लागत आहे. पाणीपट्टी भरण्याच्यादृष्टीने पंचायत समिती, ग्रामपंचायतींकडे प्रशासनाने सातत्याने पाठपुरावा केला आहे. पाणीपट्टीची दमडीही संबंधित पंचायत समिती, ग्रामपंचायतीने भरली नाही. विशेष म्हणजे पाण्याच्या मागणीसाठी सातत्याने दबाव टाकला जातो. मात्र, पाणीपट्टी भरून घेण्याच्यादृष्टीने कुणीही पुढाकार घेत नाही. त्यामुळे संबंधित विभागाला अनेक अडचणींचा सामना करावा लागत आहे. 

हेही वाचा - उन्हाचा तडाखा दिवसागणिक वाढतोय; मार्चच्या पहिल्या...

तब्बल १९० गावांसाठी पाणी राखीव - 

जिल्हा परिषदेच्या अखत्यारित असलेल्या प्रकल्पांतील ४२.१० दलघमी पाणी गेल्या ऑक्‍टोबर महिन्यातच आरक्षित करण्यात आले. जिल्ह्यातील एकूण १९० गावांना या पाण्याचा लाभ मिळणार आहे. त्यात ऊर्ध्व पैनगंगा, इसापूर धरणातील १५ दलघमी पाणी ४४ गावांसाठी आरक्षित करण्यात आले आहे. वाघाडी, सायखेडा, नवरगाव, चिरकुटा, अडाण, वाई चंडदीका आदी प्रकल्पांतील राखीव पाण्यावर गावाची तहान भागविली जाणार आहे.