राजुरा - घरगुती वादातून पतीने पत्नीची निर्घृण हत्या केली. ही घटना रविवार (ता. २६) सकाळी साडेदहा वाजताच्या सुमारास राजुरा तालुक्यातील तुलाणा या गावात घडली. मृत पत्नीचे नाव तुळजाबाई अनिल सेलूरकर असे आहे. याप्रकरणी पोलिसांनी अनिल सेलुरकर याला अटक केली आहे. आरोपी हा पत्नीवर संशय घेत होता. संशयातून हे हत्याकांड घडल्याचे पोलिस तपासातून पुढे आले आहे.

राजुरा तालुक्यात तुलाणा या गावातील अनिल सेलुरकर हा टेलरिंग कारागीर आहे. त्याला दोन अपत्य आहे. सुखाचा संसार सुरू असतानाच त्याला दारूचे व्यसनही जडले. त्यातूनच त्याचे पत्नी तुळजाबाईसोबत नेहमीच खटके उडायचे. तेंदूपत्ता आणण्यासाठी तुळजासोबत कोमल अलोनेही गेली होती. अनिलने तिलाही ठार मारण्याचा प्रयत्न केला. मात्र, तिने धावतपळत गाव गाठले. गावकऱ्यांना या घटनेची माहिती दिली.

त्यानंतर गावकऱ्यांनी विरुर पोलिसांना या घटनेची माहिती दिली. माहिती मिळताच पोलिस घटनास्थळी पोहचले. आरोपी अनिल सेलुरकर हा हत्या करून विरुर पोलिस ठाण्यात जाऊन शरण आला. पोलिसांनी घटनेचा गुन्हा नोंदवून पुढील तपास सुरु केला आहे.

जिल्हा पोलिस अधीक्षक सुदर्शन मुमक्का, स्थानिक गुन्हे शाखेचे पोलिस निरीक्षक महेश कोंडावार, उपविभागीय पोलिस अधिकारी दीपक साखरे यांच्या मार्गदर्शनाखाली विरुर पोलिस स्टेशनचे ठाणेदार संतोष वाकडे या घटनेचा तपास करीत आहे.

बोलता बोलता केला वार

रविवारी सकाळी पत्नी तुळजाबाई गावातील काही महिलांसोबत तेंदूपत्ता तोडण्यासाठी जंगलात गेली. संशयाच्या भुताने झपाटलेल्या अनिलच्या मनात वेगळाच बेत होता. जंगलाच्या रस्त्याने पत्नी तुळजाबाई तेंदूपत्ता घेऊन येत होती. गावाजवळील रस्त्यावर अनिलही तिच्यासोबत होता. तिच्याशी बोलताबोलता त्याने पत्नी तुळजावर धारदार शस्त्राने वार केले. त्यात तिचा मृत्यू झाला.