यवतमाळ : दिव्यांग असलेला पती काहीच कामधंदा न करता त्रास देत असल्याने पत्नीने शीतपेयातून विष देऊन त्याचा गेम केला. या घटनेचा उलगडा तब्बल एक महिन्यानंतर करण्यात टोळीविरोधी पथकाला यश आले. 

रामदास ईश्‍वर दहिकर (वय 47, रा. यवतमाळ) असे मृताचे नाव आहे. या प्रकरणी संशयित पत्नी कांचन हिला अवधूतवाडी पोलिसांच्या ताब्यात देण्यात आले आहे. रामदास यांचा 22 एप्रिल रोजी संशयास्पद मृत्यू झाला होता. पोलिसांनी घटनास्थळाचा पंचनामा करून मृतदेह शवविच्छेदनासाठी वैद्यकीय महाविद्यालयात पाठविला. अहवालात मृत्यूचे कारण विषबाधा हे आले होते. दिव्यांग व्यक्तीला कुणी विष दिले, हे शोधण्याचे आव्हान पोलिसांपुढे होते. लॉकडाउनच्या काळात पोलिस दिव्यांग व्यक्तींच्या मृत्यूप्रकरणाचा तपास करीत होते.

अवश्य वाचा- काय सांगता..! गोंदिया जिल्ह्यात आहे जगातील सर्वाधिक वयाची महिला (व्हिडिओ) 

मृतकाचे जेवण व त्या पूर्वीच्या हालचालींचा तपास पोलिसांनी सुरू केला. पतीचा मृत्यू झाला असताना पत्नीच्या चेहऱ्यावर दु:ख दिसून आले नाही. त्यामुळे टोळीविरोधी पथकातील पोलिस कर्मचाऱ्यांचा संशय पत्नीवर अधिकच बळावला. पोलिसांनी पत्नीला ताब्यात घेऊन विचारपूस केली. पतीला शीतपेयात विष देऊन संपविल्याची कबुली तिने दिली. पती रामदास हा दिव्यांग होता. कोणतेही काम करीत नव्हता. दोन मुले असून, शिक्षण घेत आहे. कुटुंबाचे पालन पोषण करीत नव्हता. मानसिक त्रास होत असल्याने पत्नीने टोकाचे पाऊल उचलले, अशी कबुली संशयित कांचन हिने पोलिसांत दिली.