अमरावती : जावयाने तीन लाख रुपये मागितले, ते त्यांना द्यायचे नव्हते, परंतु एकदम नकार सुद्धा देऊ शकत नाही. त्यामुळे पैशाची बॅग पाठलाग करणाऱ्या दुचाकीस्वाराने बळजबरीने हिसकावल्याची तक्रार त्यांनी दिली. मात्र, ही तक्रार बनावट असल्याची बाब पोलिसांनी (amravati police) केलेल्या चौकशीतून पुढे झाली.

सोमवारी (ता. 6) रात्री साडेसात ते आठच्या सुमारास सदर महिला बाहेर गावावरून अमरावतीत आली. मुलीकडे जाण्यासाठी ती ऑटोमध्ये बसली. ऑटोने साईनगर चौकात उतरविले. तेथून मुलीच्या घराकडे जात असताना, रात्री आठच्या सुमारास दुचाकीवरून आलेल्या दोघांपैकी एकाने या महिलेच्या हातातील 3 लाख रुपये असलेली बॅग हिसकावली. अशी तक्रार सदर महिलेने बडनेरा ठाण्यात नोंदविली. रहदारीच्या रस्त्यावर ही घटना घडल्यामुळे शहरात चांगलीच खळबळ उडाली. बडनेरा, गुन्हेशाखेच्या पोलिसांनी परिसरात चौकशी सुरू केली. अखेर महिलेच्या तक्रारीवरून त्याच दिवशी पसार दुचाकीस्वाराविरुद्ध जबरीचोरीचा गुन्हा सुद्धा दाखल केला. परंतु घटनेनंतर दोन दिवसांनी महिलेची सखोल चौकशी बडनेरा पोलिसांनी केली. तिचे सविस्तर बयाण सुद्धा नोंदविले. त्यामध्ये सदर महिलेने तीन लाखाची बॅग चोरीस गेली नसल्याची कबुली पोलिसांपुढे दिली. पैसे जवळ होते. परंतु ते जावयाला द्यायचे नव्हते. त्यामुळे आपण अशी खोटी तक्रार पोलिसांत नोंदविल्याची कबुली तिने दिली.

सीसीटीव्ही फुटेजमुळे सत्य उघड -

लुटमारीच्या तक्रारीनंतर बडनेरा पोलिसांनी बेनामचौक, साईनगर ते अकोली मार्गावरील पाच ते सहा ठिकाणचे सीसीटीव्ही फुटेज तपासले असता महिलेच्या एका हातात केवळ मोबाईल होता. दुसऱ्या हातात काहीच दिसत नव्हते. ही बाब पोलिसांनी महिलेच्या निदर्शनात आणून दिली असता, तिने सत्य पोलिसांपुढे उघड केले.