आर्णी (जि. यवतमाळ) : तीन दिवसांपूर्वी सेवानिवृत्त सैनिकाच्या घरून चोरी गेलेल्या बंदुकीच्या गोळीने आशा किसनराव पोराजवार (वय ६०) या महिलेचा मृत्यू (Woman Murder) झाला. ही घटना सोमवारी (ता. २४) सकाळी साडेनऊ वाजतादरम्यान आर्णीतील मुबारकनगरात घडल्याने खळबळ उडाली आहे. सदर महिलेवर तिच्या मोठ्या सुनेनेच गोळी झाडल्याचा आरोप छोट्या मुलाने केल्याने मृताची सून सरोज उर्फ बबली अरविंद पोराजवार हिला पोलिसांनी रात्री उशिरा ताब्यात घेतले आहे. (Woman murdered by stolen revolver of retired soldier)

प्राप्त माहितीनुसार, आशा पोराजवार या सोमवारी सकाळी रक्ताच्या थारोळ्यात कोसळल्या. त्यांना उपचारासाठी आर्णीतील रुग्णालयात नेण्यात आले. मात्र, त्यांचा मृत्यू (Woman Murder) झाला होता. माहिती मिळताच आर्णी पोलिसांनी तत्काळ घटनास्थळ गाठले. स्वयंपाकखोलीतून बंदूक, दोन निकामी काडतुसे आणि पाच जिवंत काडतुसे जप्त करण्यात आली.

मात्र, आशा पोराजवार यांच्यावर गोळी झाडणारा आरोपी कोण, हे लगेच कळू शकले नाही. महिलेवर ज्या बंदुकीतून गोळी झाडली गेली, ती गोळी सेवानिवृत्त सैनिक प्रभू गव्हाणकर यांच्या चोरी गेलेल्या बंदुकीमधील आहे. शुक्रवारी (ता. २१) गवहाणकर यांच्या घरून बंदूक व सात जिवंत काडतुसे चोरीला गेली होती. गव्हाणकर यांच्या घरासमोरच मृत महिलेचे घर आहे.

घरात वहिनी व आई यांच्यात नेहमीच लहानसहान कारणातून वाद होत होते. त्यामुळे वहिनीने गोळी झाडून आईचा खून (Woman Murder) केला, असा संशय मंगेश पोरजवार याने आर्णी पोलिस ठाण्यात दिलेल्या तक्रारीतून व्यक्त केला आहे. बंदूक चोरीला गेली, त्यावेळीही वहिनीकडे याबाबत विचारणा केल्याचा उल्लेख तक्रारीत आहे. या तक्रारीवरून पोलसांनी मंगेशची वहिनी सरोज हिला ताब्यात घेतले आहे.

घटनास्थळावर दारव्हा उपविभागीय पोलिस अधिकारी आदित्य मिलखेकेकर, ठाणेदार पितांबर जाधव, सहायक पोलिस निरीक्षक नागेश जायले, पोलिस उपनिरीक्षक किशोर खंदार, योगेश सुकलवार, विजय चव्हाण, मनोज चव्हाण, मिथुन जाधव, राजेंद्र सरदारकर, मारोती मदने, सुनील काबंळे, अमित मेश्राम यांच्यासह स्थानिक गुन्हे शाखेचे पथक उपस्थित होते.