चिपळूण : सध्या सोशल मीडियावरती एक व्हिडिओ मोठ्या प्रमाणावर व्हायरल होत आहे. व्हिडिओमध्ये भर पावसात रस्त्याच्या मध्यभागी एक मगर फिरताना दिसत आहे.

हा व्हिडिओ महाराष्ट्रातील रत्नागिरीतील चिपळूण तालुक्यातील शिवनदीजवळ असल्याचा दावा देखील केला जात आहे.

रस्त्यावर फिरणाऱ्या या मगरीला पाहण्यासाठी रस्त्यावर प्रचंड गर्दी झाली होती. या दरम्यान हा व्हिडिओ खरा आहे की, खोटा याबाबत सोशल मिडीयावर अनेक प्रश्नचिन्ह उपस्थित केले जात आहेत.

काय आहे तथ्य?

व्हायरल झालेला हा व्हिडिओ खरा आहे की नाही हे तपासण्यासाठी ई-सकाळने गुगल रिव्हर्स इमेज आणि InVid या टूल्सचा वापर केला.

व्हायरल झालेल्या व्हिडिओमध्ये मगर फिरते त्या भागातील रोडवरील काही दुकाने दिसून येत आहेत. InVid चा वापर करून आम्ही व्हिडिओमधील दुकानांची नावे तपासली. दुकानांची नावे गुगल मॅपवरती टाकले असता ती दुकाने रत्नागिरी जिल्ह्यातील चिपळूण येथील चिंचनाका परिसरातील असल्याची माहिती समोर आली आहे. गुगल Street View या फिचरचा यात फायदा झाला.

त्याचबरोबर ती मगर फिरते तिच्या मागच्या बाजूला एक दुकान आहे. त्याचे नाव आहे दिलखुष चणा भट्टी. या दुकानाचे नाव गुगल मॅपवरती शोधले असता ते रत्नागिरी जिल्ह्यातील चिपळूण येथील चिंचनाका परिसरातील असल्याचे स्पष्ट झाले.

गुगल मॅपची लिंक येथे पाहू शकता.

निष्कर्ष

'सकाळ'ने केलेल्या फॅक्टचेकमध्ये रस्त्यावरती फिरत असलेला मगरीचा व्हिडिओ चिपळूणचा असल्याचे स्पष्ट झाले. सकाळच्या चिपळूणमधील वार्ताहरनेही या वृत्ताला दुजोरा दिला आहे. या भागात पावसाळ्यात मगरीचे नागरी वस्तीत दर्शन झाल्याच्या घटना यापूर्वीही घडल्या आहेत, असे सकाळच्या स्थानिक वार्ताहराने सांगितले.

'शक्ति कलेक्टिव्ह'चा भाग म्हणून 'सकाळ'ने हे फॅक्ट चेक केले केले आहे.