बिरभूम घटनेची कलकत्ता उच्च न्यायालयाने घेतली दखल, आज घेणार सुनावणी

कोलकाता : पश्चिम बंगालमधील (West Bengal) बिरभूम जिल्ह्यात मंगळवारी (ता.२२) झालेल्या हिंसेत आठ लोक जिवंत जाळली गेल्याची घटना घडली. या घटने प्रकरणी कलकत्ता उच्च न्यायालयाने (Calcutta High Court) स्वतःहून जनहित याचिका दाखल करुन घेतली आहे. मुख्य न्यायमूर्ती प्रकाश श्रीवास्तव आज बुधवारी (ता.२३) याबाबत सुनावणी घेणार असल्याचे वृत्त एएनआय वृत्तसंस्थेने दिले. तृणमूल काँग्रेसचे (TMC) उपसरपंच भडू शेख यांची बोगतू गावात सोमवारी (ता.२१) हत्या करण्यात आली. यानंतर रामपूरहट येथे हिंसेची (Birbhum Violence) घटना घडली. येथे संतापलेल्या जमावाने आठ घरे पेटवून दिली. यात आठ लोकांचा मृत्यू झाला. मृतांमध्ये महिला आणि मुलांचा समावेश होता. (Birbhum Violence Calcutta High Court Suo Motu Congnizance)

कलकत्ता उच्च न्यायालयात मंगळवारी या घटनेबाबत याचिका दाखल करण्यात आली असून त्यात केंद्रीय गुन्हे अन्वेषण विभाग किंवा राष्ट्रीय तपास संस्थेकडून चौकशी करण्यात यावी अशी मागणी करण्यात आली आहे, असे वृत्त 'लाईव्ह लाॅ' ने दिले आहे. बुधवारी बोलताना मुख्यमंत्री ममता बॅनर्जी (Mamata Banerjee) म्हणाल्या, की हिंसा घडवून आणलेल्या लोकांना सोडले जाणार नाही. या प्रकरणी आतापर्यंत २० जणांना अटक करण्यात आल्याचे वृत्त पीटीआयने दिले.

मात्र भाजप व तृणमूल काँग्रेसमध्ये शाब्दिक युद्ध सुरु झाले आहे. या घटनेचा विरोध करत विधानसभा अधिवेशन सत्रावर भाजपने बहिष्कार टाकला. भाजपच्या आमदारांचे शिष्टामंडळ सुवेंदू अधिकारी यांच्या नेतृत्वाखाली आज घटनास्थळाला भेट देणार आहे.