Breaking : उत्तर भारतात 6.3 रिश्टर स्केलचा भूकंप; अफगाणिस्तान, पाकिस्तान हादरले!
नवी दिल्ली : गेल्या काही दिवसांपासून सीएए आणि एनआरसी सारख्या प्रश्नांमुळे धगधगत असलेली भारताची राजधानी दिल्ली शुक्रवारी (ता.20) भूकंपाच्या धक्क्यांनी हादरली.
दिल्लीसह उत्तर भारतातील राज्यांमध्ये काही ठिकाणी भूकंपाचे जोरदार धक्के बसले. 6.8 रिश्टर स्केल एवढी तीव्रता या भूकंपाची होती. अफगाणिस्तानमधील हिंदुकूशमध्ये भूकंपाचे केंद्रबिंदू असल्याचे समोर येत आहे. यामुळे भारतासह अफगाणिस्तान, उझबेकिस्तान आणि पाकिस्तानमधील नागरिकांमध्ये भीतीचे वातावरण पसरले आहे.
जमीन हादरण्यास सुरवात झाल्यानंतर अनेकांनी सुरक्षितस्थळी धाव घेतली. त्यामुळे आतापर्यंत कोणती जीवित हानी झाल्याची माहिती समोर आली नाही.
दरम्यान, भारतातील दिल्ली, चंदीगड, श्रीनगर, जम्मू-काश्मीर, फरिदाबाद, नोएडा, गाजियाबाद, मथुरा, मेरठ, हिमाचल प्रदेशमधील डलहौसी आणि चंबा याठिकाणी भूकंपाचे हादरे बसले. मात्र, याची तीव्रता कमी होती. अफगाणिस्तानमध्ये भूकंपाचा केंद्रबिंदू असल्याने अफगाणिस्तान, उझबेकिस्तान आणि पाकिस्तानमध्ये भूकंपाची तीव्रता जास्त नोंदवली गेली आहे.
पाकिस्तानची राजधानी इस्लामाबाद, रावळपिंडी आणि पेशावर या शहरांमध्ये भूकंपाने जोरदार हादरे दिले. भूकंपामुळे अफगाणिस्तानमधील झालेल्या हानीची माहिती अजून मिळाली नाही. पण, भूकंपाची तीव्रता जास्त असल्याने नागरिकांमध्ये भीतीचे वातावरण पसरले आहे.
Read latest Marathi news, Watch Live Streaming on Esakal and Maharashtra News. Breaking news from India, Pune, Mumbai. Get the Politics, Entertainment, Sports, Lifestyle, Jobs, and Education updates. And Live taja batmya on Esakal Mobile App. Download the Esakal Marathi news Channel app for Android and IOS.