कोरोना झालाय ? बूस्टर डोससाठी नवी नियमावली

देशात कोरोनाची संख्या दिवसेंदिवस वाढत आहे. अशातच केंद्र सरकार कोरोनाविषयक नवीन नियमावली सादर करत आहे. यात आता केंद्र सरकारने सर्व राज्यांना पत्र पाठवलंय. या पत्रात एखाद्या व्यक्तीला कोरोना झाला तर तीन महिन्यापर्यंत कोरोना लस किंवा बूस्टर डोस देता येणार नाही, असे स्पष्ट निर्देश देण्यात आले आहेत.

देशात लसीकरण जोमाने सुरू आहे. ३ जानेवारी २०२२ पासून १५ ते १८ वर्ष वयोगटातील मुलांचे लसीकरण सुरू झाले तर हेल्थ केअर वर्कर्स, फ्रंटलाइन वर्कर्स आणि ६० वर्षावरील नागरीकांस बूस्टर डोज १० जानेवारी २०२२ पासून देण्यास सुरवात झाली. यात केंद्र सरकारने सर्व राज्यांना पत्र पाठविल्यानंतर आता कोरोना संक्रमित असणाऱ्यांना कोरोना लस किंवा बूस्टर डोस घेण्यासाठी ३ महिने वाट पाहावी लागणार आहे.

कोरोनातून बरे झाल्यानंतर तीन महिने लस घेता येणार नाही, असे सांगताना राष्ट्रीय लसीकरण तांत्रिक सल्लागार गट (National Technical Advisory Group on Immunisation) याबाबत सातत्याने आढावा घेत असतो. त्यात काही बदल करायचे असतील तर त्यावर विचार करून निर्णय घेतला जाईल, असे केंद्र सरकारने म्हटले आहे.