कोरोनाचे नवीन रुग्ण एक लाख, दुसरी लाट ओसरली

कोरोना महामारीची दुसरी लाट हळू-हळू ओसरत आहेत. दररोज वाढणाऱ्या कोरोना रुग्णसंख्यामध्ये मोठी घट पाहायला मिळत आहे. आरोग्य मंत्रालयानं दिलेल्या माहितीनुसार, रविवारी कोरोनाबाधित रुग्णांच्या संख्येत विक्रमी घट पाहायला मिळाली. रविवारी देशात एक लाख 636 नवीन कोरोना रुग्ण आढळले आहेत. मागील तीन महिन्यातील ही सर्वात कमी कोरोना रुग्णवाढ आहे. मागील काही दिवसांमध्ये कोरोनाच्या दुसरी लाट हळूहळू कमी होत असल्याचं दिसत आहे.

आरोग्य मंत्रालयानं दिलेल्या माहितीनुसार, मागील 24 तासांत एक लाख 636 नवीन कोरोना रुग्ण आढळले आहेत. तर 2427 जणांचा मृत्यू झाला आहे. मागील काही दिवसांतील मृताची संख्याही घटताना दिसत आहे. याच कालावधीत एक लाख 74 हजार 399 जणांनी कोरोनावर मात केली आहे. त्यामुळे देशातील उपचाराधीन रुग्णसंख्याही घसरली आहे. देशातील उपचाराधीन रुग्णसंख्या 14 लाखांपर्यंत येऊन ठेपली आहे.

ICMR नं दिलेल्या माहितीनुसार, रविवारी देशात 15 लाख 87 हजार 589 कोरोना चाचण्या घेण्यात आल्या आहेत. आतापर्पंत देशात 36 कोटी 63 लाख 34 हजार 111 कोरोना चाचण्या घेण्यात आल्या आहेत.

देशातील सध्याची कोरोना स्थिती -

एकूण कोरोना रुग्ण - 2,89,09,975

एकूण कोरोनामुक्त - 2,71,59,180

एकूण मृत्यू - 3,49,186

उपचाराधीन रुग्ण - 14,01,609

एकूण लसीकरण - 23,27,86,482