'प्रामाणिक व्यक्तीला न्याय मिळत नाही'; तरुणाची आत्महत्या

लखनऊ- 'देशातील कायदा-व्यवस्था आणि भ्रष्टाचारामुळे त्रासलो आहे. येथे प्रामाणिक व्यक्तीसाठी काहीही न्याय नाही. माझ्या मृत्यूसाठी स्टेशन प्रभारी, माझे शेजारी आणि माझे दोन काका जबाबदार आहेत. यांनी माझ्या कुटुंबियांसोबत धोका केला आहे. आज मी मरत आहे, याला जबाबदार हे सर्व लोक आहेत.' असा व्हिडिओ रिकॉर्ड करत अयोध्येतील एका युवकाने रेल्वे ट्रॅकखाली येऊन जीव दिला आहे. (man suicide at ayodhya after rocording video)

पोलिस या प्रकरणाचा तपास करत आहेत. आत्महत्या करण्यापूर्वी तरुणाने रिकॉर्ड केलेला व्हिडिओ व्हायरल झाल्यानंतर खळबळ उडाली आहे. व्हिडिओमध्ये कायदा-व्यवस्थेबाबत प्रश्न उपस्थित करण्यात आले आहेत. सत्य जाणून घेण्यासाठी पोलिस अधीक्षक ग्रामीण पूर्ण प्रकरणाचा तपास करत आहेत. प्रकरण सुलतानपूर गल्लीतला आहे. स्थानिक रहिवासी असलेला तरुण अमित मौर्याचा मृतदेह गुरुवारी सकाळी बेनीगंज रेल्वे क्रॉसिंगच्या रुळावर मिळाला.

पोलिसांनी या प्रकरणाचा तपास सुरु केल्यानंतर अनेक गोष्टींचा खुलासा होत गेला. युवकाने आत्महत्या करण्यापूर्वी सोशल मीडियावर आपल्या मरणाचं कारण सांगितलंय. त्याने रेल्वे रुळावर जाऊन एक व्हीडिओ केला. व्हिडिओमध्ये त्याने कायदा-व्यवस्था यासह इतर मुद्द्यांबाबत प्रश्न उपस्थित केले. युवकाच्या आत्महत्येमुळे आणि त्याच्या व्हिडिओमुळे पोलिसांच्या कार्यप्रणालीबाबत प्रश्न उपस्थित होत आहेत.

वरिष्ठ पोलिस अधीक्षक शैलेश कुमार पांडेय यांनी सांगितलं की, युवकाच्या आत्महत्येमागे जमीनसंबंधी वाद असल्याचं समोर आलं आहे. प्रकरण सिटी मॅजिस्ट्रेट न्यायालयात प्रलंबित आहे. एसपी ग्रामीण शैलेंद्र कुमार सिंह या प्रकरणाचा तपास करत आहेत. त्यांनी सांगितलं की, रिपोर्ट मिळाल्यानंतर आवश्यक ती कार्यवाही करण्यात येईल. दरम्यान, युवकाच्या आत्महत्येमुळे राजकीय वातावरणही तापलंय.