Rajasthan Election Voting : राजस्थानच्या 199 विधानसभा जागांसाठी आज मतदान; 1,863 उमेदवार रिंगणात, भाजप-काँग्रेसमध्ये 'काटे की टक्कर'

Rajasthan Assembly Elections Voting : राजस्थानमध्ये आज (शनिवार) म्हणजेच, 25 नोव्हेंबर रोजी विधानसभा निवडणुकीच्या 199 जागांसाठी मतदान होत आहे. काँग्रेस (Congress) उमेदवाराच्या निधनामुळं करणपूर विधानसभेची निवडणूक पुढं ढकलण्यात आली आहे.

विधानसभेच्या 199 जागांसाठी 1 हजार 863 उमेदवार रिंगणात असून त्यांचं भवितव्य 5 कोटी 25 लाख 38 हजार 105 मतदार ठरवणार आहेत. विद्यमान मुख्यमंत्री अशोक गेहलोत (Ashok Gehlot), माजी मुख्यमंत्री वसुंधरा राजे (Vasundhara Raje), सचिन पायलट, राज्यवर्धन सिंह राठोड आणि दिया कुमारी यांच्यासह अनेक दिग्गज नेत्यांचे भवितव्य आज मतपेटीत (ईव्हीएम) बंद होणार आहे.

राजस्थानचे मुख्यमंत्री अशोक गेहलोत म्हणाले, यावेळी पुन्हा काँग्रेस सरकारची पुनरावृत्ती होईल, हे निश्चित आहे. सरकारची पुनरावृत्ती करण्याचा सध्या जनतेचा मूड आहे. दरम्यान, राजस्थान विधानसभा निवडणुकीत पाकिस्तानच्या सीमेला लागून असलेल्या राज्यातील बारमेर जिल्ह्यातील पार गावात एका कुटुंबासाठी स्वतंत्र मतदान केंद्र बनवण्यात आलं आहे. हे राज्यातील सर्वात लहान मतदान केंद्र आहे. या मतदान केंद्रावर एका कुटुंबातील 35 सदस्य मतदान करणार आहेत.