मोठी बातमी! 'स्वाभिमानी'ला महामार्गावर 'चक्काजाम' करणं भोवलं; राजू शेट्टींसह अडीच हजार शेतकऱ्यांवर गुन्हा दाखल

Raju Shetti Chakka Jam Andolan : स्वाभिमानी शेतकरी संघटनेने पुणे-बंगळूर राष्ट्रीय महामार्गावरील (Pune-Bangalore National Highway) शिरोली येथील पुलावर काल (गुरुवार) तब्बल आठ तास केलेल्या चक्काजाम आंदोलनानंतर (Sugarcane Rate Chakka Jam Andolan) ऊसदराची कोंडी फुटली. मात्र, असे असतानाच आज स्वाभिमानीच्या कार्यकर्त्यांवर गुन्हा दाखल करण्यात आला आहे.

दरम्यान, स्वाभिमानी शेतकरी संघटनेचे नेते राजू शेट्टी (Raju Shetti) यांच्यासह तब्बल अडीच हजार कार्यकर्त्यांवर कोल्हापूर पोलिसांनी गुन्हा दाखल केलाय. शेट्टी आणि त्यांच्या कार्यकर्त्यांनी गुरुवारी तब्बल 8 तास पुणे-बंगळूर महामार्ग रोखल्यामुळे गुन्हा दाखल झाल्याची माहिती मिळाली आहे.

कोल्हापूर पोलीस दलाच्या शिरोली पोलीस ठाण्यात (Shiroli Police Station) शेट्टी यांच्यावर गुन्हा दाखल केल्याची माहिती पोलीस ठाण्यातून नुकतीच देण्यात आली आहे. या गुन्ह्याबाबत राजू शेट्टी यांनी अद्याप कोणतीही प्रतिक्रिया दिलेली नाही.

'हंगामात प्रतिटन ३१०० रुपये पहिला हप्ता देण्यात येणार'

गेल्यावर्षीच्या हंगामामध्ये प्रतिटन ३००० रुपये पेक्षा जास्त दर दिलेल्या साखर कारखान्यांकडून प्रतिटन ५० रुपये, तर त्यापेक्षा कमी दर देणाऱ्यांकडून १०० रुपये दुसरा हप्ता दोन महिन्यांनंतर दिला जाणार आहे. तसेच, यावर्षीच्या गळीत हंगामात प्रतिटन ३१०० रुपये पहिला हप्ता देण्यात येणार असल्याचे सांगून चक्काजाम आंदोलन मागे घेतल्याची घोषणा काल माजी खासदार राजू शेट्टी यांनी केली होती.

महामार्गावर तब्बल आठ तासांचे चक्काजाम आंदोलन

सहाशे पोलिसांचा बंदोबस्त आणि पहाटेपासून सुरू असणारी कार्यकर्त्यांची धरपकड झुगारून स्वाभिमानी शेतकरी संघटनेने काल (गुरुवार) पुणे-बंगळूर राष्ट्रीय महामार्गावर तब्बल आठ तासांचे चक्काजाम आंदोलन केले. त्यामुळे या मार्गावरील वाहतूक पर्यायी मार्गाने वळवली असली तरीही अवजड वाहनांची कऱ्हाडपर्यंतच्या दुतर्फा रस्त्यांवर रांगाच-रांगा पहायला मिळाल्या. पुणे, मुंबईहून कागल, बेळगावला जाणारे आणि बेळगावहून पुणे मुंबईला जाणाऱ्या वाहतूकदारांचे प्रचंड हाल झाले.