केजरीवाल यांच्या ट्विटवर सिंगापूरचा आक्षेप; केंद्राने झापलं

नवी दिल्ली - कोरोनाच्या (Corona) सिंगापूर (Singapore) व्हेरियंटबाबत दिल्लीचे (Delhi) मुख्यमंत्री अरविंद केजरीवाल (CM Arvind Kejariwal) यांनी वक्तव्य केलं होतं. केजरीवाल यांच्या वक्तव्यावर सिंगापूरने आक्षेप घेतला असून त्यानंतर भारताच्या (India) परराष्ट्र मंत्र्यांनी केजरीवाल यांना झापलं आहे. सिंगापूर उच्चायुक्तालयाने याबाबत भारताच्या दूतावासाला याची माहिती दिली. केजरीवाल यांनी मंगळवारी केंद्र सरकारकडे विनंती केली होती की, सिंगापूरमधून येणाऱ्या विमानांना बंदी घालावी, उड्डाणे रद्द करण्यात यावीत. तिथे असलेला कोरोनाचा व्हेरियंट लहान मुलांसाठी धोकादायक असल्याचं म्हटलं जात आहे. (singapore-object-on-delhi-cm-about-covid-19-strain-india-government-warns)

केजरीवाल यांनी केलेल्या या वक्तव्यानंतर सिंगापूरने भारतीय उच्चायुक्तालयाला याबाबत कळवले. त्यानंतर परराष्ट्र मंत्रालयाने बुधवारी दिल्लीचे मुख्यमंत्री केजरीवाल यांना झापलं आहे. सिंगापूर सरकारने सिंगापूर व्हेरियंटबाबत दिल्लीच्या मुख्यंत्र्यांनी केलेल्या ट्विटवर आक्षेप नोंदवला आहे. सिंगापूरने यासाठी भारताच्या उच्चायुक्तांना चर्चेसाठी बोलावलं आहे. याची माहिती परराष्ट्र मंत्रालयाचे प्रवक्ते अरिंदम बागची यांनी दिली. ते म्हणाले की,उच्चायुक्तांनी स्पष्ट केलं की, मुख्यमंत्र्यांकडे कोरोना व्हेरियंट किंवा विमान उड्डाणांबाबत टीका करण्याचा अधिकार नाही.

पराराष्ट्र मंत्री एस जयशंकर यांनी सिंगापूरसोबत भारताच्या संबंधाचे कौतुक केले. ते म्हणाले की,''दिल्लीचे मुख्यमंत्री म्हणजे भारताचा आवाज नाही, सिंगापूर आणि भारत कोरोनाविरोधातील लढ्यात एकत्र लढत आहेत. ऑक्सिजन पुरवणाऱ्या सिंगापूरच्या भूमिकेचं कौतुक आहे. आमच्या मदतीसाठी लष्करी विमाने तैनात करणं हे आपल्या खास संबंधाचे प्रतिक आहे. मात्र लोकांना माहिती असायला हवं की, त्यांच्या बेजबाबदार वक्तव्यांमुळे दोन्ही राष्ट्रांच्या संबंधावर परिणाम होऊ शकतात. त्यामुळे इथं स्पष्ट सांगतो की दिल्लीच्या मुख्यमंत्र्यांना यावर बोलण्याचा अधिकार नाही.

केजलीवाल यांनी ट्वीटमध्ये म्हटलं होतं की,"सिंगापूरमध्ये आलेला कोरोनाचा नवा स्ट्रेन लहान मुलांसाठी अत्यंत धोकादायक असल्याचं सांगण्यात येत आहे. भारतात हा स्ट्रेन कोरोनाच्या तिसऱ्या लाटेच्या स्वरुपात दाखल होऊ शकतो. त्यामुळे केंद्र सरकारला आवाहन आहे की, सिंगापूरसोबतची भारताची हवाई सेवा तात्काळ प्रभावानं स्थगित करण्यात यावी. तसंच लहान मुलांनाही कोरोना प्रतिबंधक लस देता येईल का? याबाबत प्राधान्याने काम व्हावं."

केजरीवाल यांच्या ट्विटला सिंगापूर दुतावासाने एका ट्विटमधून उत्तर दिलं आहे. यात सिंगापूरने म्हटलं की, अशा प्रकारच्या दाव्यात काहीच सत्य नाही, सिंगापूरमध्ये फायलोजेनेटिक चाचणीतून असं समोर आलं आहे की, सिंगापूरमध्ये नुकतंच मुलांसह अनेक कोरोना रुग्णांमध्ये बी 1.617.2 व्हेरियंट आढळला आहे.