धावता ट्रक डिव्हायडरवर घुसला अन् ३ जणांचा घेतला बळी

चंदीगड : हरियाणाच्या झज्जर जिल्ह्यातील KMP म्हणजेच कुंडली-मानेसर-पलवल एक्सप्रेसवेवर झालेल्या अपघातात ३ जणांचा मृत्यू झाला आहे. या अपघातात १० जण गंभीर जखमी झाले असून जखमींनी उपचारासाठी रोहतकमधील एका हॉस्पिटलमध्ये पाठवण्यात आल्याचं पोलिसांनी सांगितलं.

(KMP Expressway Accident)

हरियाणातील झज्जर जिल्ह्यातील आसोदा टोलनाक्याजवळ कुंडली-मानेसर-पलवल एक्सप्रेसवेवर दुरुस्तीचे काम सुरु असताना हा अपघात घडला. रस्त्याचे काम करणारे कर्मचारी थकून रस्त्याच्या कडेला झोपले होते. तेव्हा पाठीमागून भरधाव वेगाने येणाऱ्या ट्रकवरील चालकाचे नियंत्रण सुटून झोपलेल्या कर्मचाऱ्यांच्या अंगावर गेला. या घटनेनंतर आरडाओरड झाली आणि अपघाताची माहिती मिळताच पोलिस घटनास्थळी दाखल झाले. पोलिसांनी जखमींना तात्काळ रूग्णालयात दाखल केले असून मृतांचे मृतदेह शवविच्छेदनासाठी पाठवण्यात आल्याचं सांगितलं आहे.

या अपघातात ट्रक दुभाजकाला धडकून सुमारे १४ लोकांच्या अंगावर गेला होता. त्यामधील ३ लोकांचा मृत्यू झाला असून बाकीच्या जखमींना रूग्णालयात दाखल करण्यात आलं आहे. या अपघातात ट्रकचेही नुकसान झाले आहे.

हे सर्व मजूर केएमपी एक्स्प्रेस वेवर काम करत असल्याचे सांगण्यात येत आहे. हे लोक विश्रांतीसाठी रस्त्याच्या कडेला झोपले होते. यादरम्यान एक भरधाव ट्रकवरील चालकाचे नियंत्रण सुटले आणि आणि झोपलेल्या लोकांना धडक दिली.

"या अपघातातील काही लोक बचावले असून त्यांचे प्राण वाचवण्यात आले आहेत. मृतांचे मृतदेह शवविच्छेदनासाठी बहादुरगड सामान्य रुग्णालयात पाठवले आहे. आसोदा टोलनाक्याजवळ हा अपघात झाला असून पुढील तपास सुरू आहे." असं पोलिसांनी सांगितले.