West Bengal : विद्यार्थिनीला शिवीगाळ, महिला शिक्षिकेला संतप्त जमावाकडून विवस्त्र करत मारहाण

पश्चिम बंगाल येथील दक्षिण दिनाजपूर जिल्ह्यातून एक धक्कादायक बातमी समोर येत आहे. एका महिला शिक्षकाने विद्यार्थीनीला शिक्षा केल्याने संबंधित शिक्षिकेला विवस्त्र करुन मारहाण करण्यात आली आहे. ही घटना परिसरातील हिली पोलिस स्टेशन हद्दीतील त्रिमोहिनी प्रताप चंद्रा या हायस्कूलमध्ये घडली असल्याची माहिती मिळत आहे. या घटनेसंदर्भात पोलिसांनी चार जणांना अटक केली आहे.

मिळालेल्या माहितीनुसार, या हायस्कूलमध्ये गुरुवारी विद्यार्थिनीला एका महिला शिक्षकाने शिवीगाळ केली होती. यानंतर दुसऱ्या दिवशी दुपारी विद्यार्थीनीचे कुटुंबिय अचानक शाळेत दाखल झाले. त्यांनी या प्रकरणाची तक्रार हायस्कुलच्या मुख्याध्यापकांकडे केली. यादरम्यान, काही लोकांनी त्या महिला शिक्षेकेला मारहाण करण्यास सुरु केली. तिला विवस्त्र करुन ही मारहाण करण्यात आल्याचा आरोप होत आहे. ९ वी मध्ये शिकणारी संबंधित विद्यार्थीनी अल्पसंख्याक समुदायाची असल्याचे सांगण्यात येत आहे.

या घटनेची माहिती मिळताच पोलिस तात्काळ घटनास्थळी दाखल झाले. हे प्रकरण शांत करत असताना पोलिसांना स्थानिक नागरिकांमध्ये रोष दिसून आला. दरम्यान, शनिवारी या घटनेचा निषेध करत स्थानिकांनी या परिसरात रास्ता रोको आंदोलन केले. महिला शिक्षिकेला मारहाण करणाऱ्यांवर कठोर कारवाई करण्याची मागणी भाजपाच्या भाजपचे खासदार सुकांत मजुमदार यांनी केली आहे.

या घटनेसंदर्भात भाजप खासदार मजुमदार म्हणाले, मीही एक शिक्षक होतो. अनेक विद्यार्थ्यांनाही मी फटकारले आहे. संबंधित शिक्षिकेने विद्यार्थिनीला शिवीगाळ केल्यावर तिच्या कुटुंबाने दोनशे लोकांनी शाळेवर हल्ला केला. मात्र शाळेच्या मुख्याध्यापकांनी एफआयआर नोंदवला नाही याचे मला आश्चर्य वाटते, अशी प्रतिक्रिया त्यांनी दिली आहे.

याप्रकरणी सुरुवातील पोलिसांनी गुन्हा नोंद केला नव्हता मात्र दुसऱ्या दिवशी स्थानिकांनी रस्ता रोको आंदोलन केल्यानंतर पोलिसांनी 35 जणांविरुद्ध एफआयआर नोंदवला आहे. या घटनेबाबत पीडित शिक्षिकेने सांगितले, विद्यार्थिनीला शिस्त लावण्यासाठी तिचे कान ओढत शिवीगाळ केली होती. पण यापूर्वी अशी घटना कधीही घडली नाही. या घटनेमुळे आम्हाला असुरक्षित वाटत आहे.

या घटनेसंदर्भात बीडीओ आणि अध्यक्षांना फोन करून माहिती दिली आहे. मला सुरक्षिततेची कमतरता जाणवत आहे. जे घडले ते अपेक्षित नव्हते, अशी प्रतिक्रिया हायस्कूलचे मुख्याध्यापक कमल कुमार जैन यांनी दिली आहे.