देशप्रेमाची झिंग! युक्रेनमध्ये बिअर कंपनीकडून पेट्रोल बॉम्बची निर्मिती

Russia Ukraine War : रशियन सैन्याचा मुकाबला करण्यासाठी युक्रेन सरकारने देशातील जनतेला मोलोटोव्ह कॉकटेल पेट्रोल बॉम्ब (Molotov cocktail Petrol Bomb) बनवण्याचे आवाहन केले आहे. या आवाहनाला प्रतिसाद देत युक्रेनमधील एका बिअर कंपनीच्या कर्मचाऱ्यांनी बिअरऐवजी मोलोटोव्ह कॉकटेल पेट्रोल बॉम्ब बनवण्यास सुरुवात केली आहे. (Ukraine Beer Company Making Molotov cocktail Petrol Bomb)

रशियाच्या सैन्याशी युक्रेनच्या सैन्यासह अनेक नागरिकांनीदेखील पुढाकार घेतला असून, आता यामध्ये बिअर उत्पादन कंपनीनेदेखील पुढाकार घेतला आहे. ल्विव्ह हे युक्रेनमधील एक ऐतिहासिक शहर असून रशियन सैन्य या शहरावर हल्ला करून ते नष्ट करू शकते, अशी भीती आहे. त्यामुळे अशा परिस्थितीत रशियन सैन्याला तोंड देण्यासाठी प्रवदा ब्रुअरीच्या कर्मचाऱ्यांनी बीअरऐवजी मोलोटोव्ह कॉकटेल बॉम्ब बनवण्यास सुरुवात केली आहे.

तत्पूर्वी, रशियाविरोधात लढण्यास (Ukraine Russia War) तयार असल्यास युक्रेनमधील कैद्यांची (Ukraine prisoners) तुरुंगातून सुटका करण्यात येईल, अशी थेट ऑफरच युक्रेनचे राष्ट्राध्यक्ष वोलोदिमिर झेलेन्स्की यांनी कैद्यांना दिल्याचे वृत्त रॉयटर्सने प्रकाशित केले आहे.

चर्चेतून आणि शांततेने मार्ग काढावा

रशिया आणि युक्रेनमधील युद्धावर अद्यापपर्यंत तरी तोडगा निघालेला नाही. दरम्यान, चर्चेतून आणि शांततेच्या मार्गातून दोन्ही देशांनी यावर मार्ग काढावा, असा सल्ला भारतासह अनेक देशांनी युक्रेन आणि रशियाला दिला आहे.