PSL Ball boy : बॉलबॉय असलो म्हणून काय झालं जलवा तर आपलाच! पाकिस्तानातील हा Video तुफान व्हायरल, टॅलेंट पाहून मुनरोही भारावला

Pakistan Super League Ball boy Catch Video : टॅलेंट आहे हो फक्त संधी अन् व्यासपीठ मिळत नाही! हे वाक्य आपण खूपवेळा अनेकांच्या तोंडून ऐकलं असेल. मात्र टॅलेंट असेल तर संधी आपोआप निर्माण करता येते मग त्यासाठी अमुकच व्यासपीठ मिळायला हवं असं नाही. पाकिस्तान सुपर लीगमधील एक व्हिडिओ हीच शिकवण देऊन जात आहे.

पाकिस्तान सुपर लीगमधील एका बॉल बॉयचा व्हिडिओ सध्या सोशल मीडियावर तुफान व्हायरल होत आहे. क्रिकेटमध्ये सगळा काही खेळ हा सीमारेषेच्या आत घडत असतो. या रिंगणात आपलं टॅलेंट दाखवायचं असेल तर त्यासाठी आधी संघात आणि मग प्लेईंग 11 मध्ये निवडलं जाणं गरजेचं आहे. मात्र पाकिस्तान सुपर लीगमधील हा पोरगा या सगळ्या गोष्टीला अपवाद ठरला.

4 मार्चला पीएसएलमध्ये इस्लामाबाद युनायटेडने रावळपिंडी येथील सामन्यात पेशावर जाल्मीचा 29 धावांनी पराभव केला. मात्र या सामन्यात सर्व प्रकाशझोत हा एका बॉल बॉयने मिळवला. त्याने सीमारेषेबाहेर अशी काही जबरदस्त फिल्डिंग केली की कॉलिन मुनरोला देखील त्याला मिठी मारावीशी वाटली. हा व्हिडिओ सोशल मीडियावर चांगलाच व्हायरल झाला.

सामन्याच्या 19 व्या षटकात आरिफ याकूबने रमन रईसच्या गोलंदाजीवर टोलेजंग फटका लगावला. यावेळी सीमारेषेवर असलेल्या कॉलिन मुनरोने हा उंच गेलेला चेंडू झेलण्यासाठी पुढे सरसावला. मात्र चेंडू त्याच्या आवाक्याबाहेर होता.

चेंडू जरी मुनरोच्या आवाक्याबाहेर असला तरी तो बॉल बॉयने डाईव्ह मारत आपल्या आवाक्यात आणला अन् झेल टिपला. बॉलबॉयने जरी सीमारेषेबाहेर झेल पकडला असल्याने फलंदाज बाद होणार होता. यात संघाचा बॉल बॉयचा काहीच फायदा नव्हता. कारण बॉलबॉयचं काम हे फक्त सीमारेषेबाहेरील चेंडू आत फेकणं एवढंच होतं. मात्र हे काम करताना देकील त्या बॉल बॉयने आपलं टॅलेंट दाखवून दिलं.

यामुळेच आपलं टॅलेंट दाखवण्याची संधी कधी अन् कशी येईल हे सांगता येत नाही. अशी अचानक आलेली संधी पटकन साधण्यासाठी तुम्ही फक्त तयार हवं. हा बॉल बॉय तयार होता. त्याने एकदा नाही तर दोनदा डाईव्ह मारून झेल पकडले. यामुळे तो अख्या जगात फेमस झालाय. मात्र या प्रसिद्ध करणाऱ्या क्षणामागे कित्येक दिवसांची मेहनत नक्कीच असणार. मेहनतीशिवाय असा झेल घेणं शक्य नाही हे मात्र नक्की!

(Sports Latest News)