Ashok Chavan : फडणवीसांच्या भेटीनंतर अशोक चव्हाणांचा तातडीचा दिल्ली दौरा

Ashok Chavan : राज्याचे उपमुख्यमंत्री देवेंद्र फडणवीस आणि काँग्रेसचे ज्येष्ठ नेते अशोक चव्हाण यांच्या भेटीनंतर अनेक चर्चांना उधाण आले होते. मात्र, आता या भेटीबाबत खुद्द चव्हाणांनीच स्पष्टीकरण दिले असून, यानंतर या चर्चांना काहीसा ब्रेक लागला आहे.

फडणवीसांच्या भेटीबाबत स्पष्टीकरण देताना चव्हाण म्हणाले की, भाजप आणि शिंदे गटामध्ये समन्वयासाठी नियुक्त केलेल्या आशिष कुलकर्णी यांच्या घरच्या गणपतीसाठी मी गेलो होता. त्यावेळी तेथे माझी आणि फडणवीसांची उभ्या-उभ्या भेट झाल्याचे अशोक चव्हाणांनी सांगितलं आहे. या भेटीदरम्यान कोणतीही राजकीय चर्चा झाली नसल्याचेही चव्हाण म्हणाले. दरम्यान, रविवारी दिल्लीत होणाऱ्या काँग्रेसच्या मोर्चासाठी उद्या राजधानीत जाणार असल्याचेही चव्हाण यांनी यावेळी सांगितले.

गणपतीचं दर्शन चर्चा मात्र काँग्रेस फुटची

अशोक चव्हाण आणि उपमुख्यमंत्री देवेंद्र फडणवीस काल रात्री आशिष कुलकर्णी यांच्या घरी गणपतीचे दर्शन घेण्यासाठी गेले होते. त्यावेळी अशोक चव्हाण आणि फडणवीसांमध्ये चर्चा झाल्याचं वृत्त समोर आलं होतं. त्यानंतर भाजप आता काँग्रेसमधील नेत्यांनाही फोडणार असल्याच्या चर्चांना उत आला होता. मात्र, आता स्वतः अशोक चव्हाणांनीच स्पष्टीकरण देत या सर्व चर्चांना पूर्णविराम दिला आहे.