राज्यात येत्या पाच दिवसांत सोसाट्याच्या वाऱ्यांसह वादळाची शक्यता

पुणे : पुढील पाच दिवसांमध्ये राज्यातील काही जिल्ह्यांमध्ये विजांच्या कडकडाटासह पाऊस पडण्याची शक्यता भारतीय हवामान विभागाने वर्तवली आहे. पुणे (Pune) येथील हवामान विभागाचे शास्त्रज्ञ के.एस.होसळीकर यांनी हवामान अंदाजाविषयी (Weather Update) माहिती दिली आहे. पश्चिम किनार्‍यावर ऑफ-शोअर ट्रफ आणि पश्चिमेकडील वाऱ्यांच्या प्रभावाखाली आहे. (IMD Prediction Coming Five Days Speedy Waves Along With Cyclone In Maharashtra)

येत्या पाच दिवसांत राज्यातील काही जिल्ह्यांमध्ये विजांचा कडकडाट आणि सोसाट्याच्या वाऱ्यांसह वादळाची शक्यता असल्याचे हवामान विभागाने अंदाज वर्तवल्याचे होसळीकर यांनी ट्विट करुन माहिती दिली आहे. राज्यात मान्सूनचे आगमन झाले आहे. सोमवारी (ता.१४) मराठवाड्याची राजधानी औरंगाबादमध्ये रात्री मुसळधार पाऊस झाला. मात्र राज्यातील अनेक भागाला अद्यापही पावसाची प्रतिक्षा आहे.

मध्य महाराष्ट्र, मराठवाडा आणि कर्नाटकच्या काही भागांमध्ये मान्सून पुढे सरकला आहे. तसेच तेलंगणा, पश्चिम बंगाल आणि बिहारच्या काही भागात सोमवारी (ता.१३) पाऊस दाखल झाला आहे.