दापोली : दापोली-खेड-मंडणगड विधानसभा मतदारसंघातील प्रलंबित विकासकामे आणि नागरिकांच्या मूलभूत प्रश्नांकडे लक्ष वेधण्यासाठी दापोली तहसील कार्यालयासमोर सुरू करण्यात आलेले भाजपाचे उपोषण अखेर प्रशासनाच्या लेखी आश्वासनानंतर स्थगित करण्यात आले. विविध विभागांच्या अधिकाऱ्यांनी आंदोलनकर्त्यांची भेट घेऊन मागण्यांबाबत सकारात्मक कार्यवाहीचे पत्र दिल्यानंतर उपोषण मागे घेण्यात आले. दापोली तालुका भाजपच्या वतीने १५ ऑगस्टपासून उपोषण सुरू केले होते. आंदोलनात माजी उत्तर रत्नागिरी जिल्हाध्यक्ष केदार साठे, तालुकाध्यक्ष जया साळवी, शहराध्यक्ष सचिन होडबे, संदीप केळकर, भाऊ इदाते यांच्यासह पदाधिकारी सहभागी झाले होते. शिवसेना (उबाठा) पक्षाचे ऋषिकेश गुजर व माजी नगराध्यक्षा ममता मोरे यांनीही आंदोलनाला पाठिंबा दिला.
