मुनमुन धामेचाचं नाव विनाकारण गोवण्यात आलं; वकिलांचा कोर्टात दावा

मुंबई : आर्यन आणि आरबाज यांच्या जामीनाला विरोध केल्यानंतर एनसीबीनं मुनमुन धामेचा हीच्या जामिनाला देखील विरोध केला. हे सर्वजण एकमेकांच्या संपर्कात असण्याची दाट शक्यता आहे. त्यामुळे यांपैकी कोणालाही जामीन देण्यात येऊ नये, हा तपास अद्याप प्राथमिक अवस्थेत आहे, असं एनसीबीच्या वकिलांनी कोर्टात सुनावणीदरम्यान म्हटलं. परंतू, मुनमुन धामेचा हीच्या वकिलांनी तिला जामीन मिळावा अशी कोर्टाकडे मागणी करताना त्याचं कारणंही स्पष्ट केलं आहे.

मुनमुनच्या वकिलांनी म्हटलं की, "मुनमुनचा आर्यन किंवा आरबाज या कुणाशीही थेट संबंध नाही. ती त्यांना ओळखतही नव्हती. त्याचबरोबर तिच्याकडून जरी अंमली पदार्थ हस्तगत करण्यात आले असले तरी त्याचं प्रमाण खूपच कमी होतं. एनडीपीएस कायद्यानुसार अंमलीपदार्थ्यांचं प्रमाण किती आहे हे महत्वाचं असतं. त्या प्रमाणानुसार संबंधित आरोपीला शिक्षा दिली जाते.

जर अंमली पदार्थ इतरांना विकण्यासाठी तुम्ही मोठ्या प्रमाणावर ते जवळ बाळगत असाल तर तुमच्या अडचणी वाढू शकतात. मात्र, जर ते कमी प्रमाणात असेल किंवा वैयक्तित सेवनासाठी स्वतःजवळ ठेवलं असेल तर शिक्षेची तरतूद कमी आहे. हाच दावा मुनमुनच्या वकिलांनी कोर्टात केला आहे. या आधारेच मुनमुनचा या ड्रग्ज तस्करीशी किंवा पकडलेल्या आरोपींशी कुठलाही संबंध नाही. त्यामुळं कोर्टानं आपल्याला जामीन द्यावा अशी मागणी मुनमुन धामेचा हीनं आपल्या वकिलांकरवी केली आहे.

आतंरराष्ट्रीय ड्रग्ज तस्करांशी याचे धागेदोरे गुंतलेले आहेत. ही गौतम बुद्ध आणि गांधींची भूमी आहे. तसेच स्वातंत्र्यवीरांना या सैर स्वातंत्र्यासाठी लढा दिला होता का? त्यामुळं कोणालाही जामीन देण्यात येऊ नये. कठोर शिक्षा झाल्याशिवाय या गोष्टी थांबणार नाहीत. अशी भावनिक साद एसीबीनं कोर्टात केली आहे.