महापालिका शाळेत भगवद्गीता नाही तर मग काय... - नितेश राणे

सध्या मुंबई महापालिकेच्या (BMC) निवडणुकांच्या पार्श्वभूमिवर राजकीय वातावरण बदलले आहे. सत्ताधारी आणि विरोधक यांच्यात बऱ्याचवेळा अनेक आरोप पहायला मिळत आहे. दरम्यान, आता भाजपाचे नितेश राणे यांनी एक ट्वीट करत मुख्यमंत्री उद्धव ठाकरे (Uddhav Thackeray) यांच्यावर निशाणा साधला आहे. महापालिकेच्या शाळांमध्ये भगवद्गीता पठणाच्या प्रस्तावावरून त्यांनी शिवसेनेला (Shivsena) टोला लगावला आहे.

नितेश राणे (Nitesh Rane) म्हणतात, मुंबई महापालिकेमध्ये भारतीय जनता पक्षाच्या (BJP) योगिता कोळी यांनी महापालिका शाळांमध्ये भगवद्गीतेचं पठण व्हाव असा प्रस्ताव महापौरांचा समोर मांडला आहे. या प्रस्तावाला समाजवादी पक्षाने विरोध केला आहे. हिंदुराष्ट्र असणाऱ्या देशात भगवद्गीतेच्या पठणाला विरोध होणं हे अत्यंत दुर्देव आहे. जर आपल्या शाळांत भगवद्गीतेचं (Bhagavad Gita) पठण करायचं नाही तर मग काय फतवा-ए-आलमगिरीचं पठण झाले पाहिजे का? असा सवाल त्यांनी केला आहे.

यावेळी मुख्यमंत्र्यांना उद्देशून राणे म्हणाले, हिंदुहृहय सम्राट बाळासाहेब ठाकरे यांचे सुपुत्र म्हणून आम्ही आपल्याकडून अपेक्षा ठेवतो की, भगवद्गीतेच्या पठणासंदर्भात जो प्रस्ताव महापालिकेमध्ये मांडला आहे तो मान्य करण्याचे आदेश द्यावेत, असा खोचक टोला त्यांनी लगावला आहे.