Hingoli Accident : हिंगोली-सेनगाव मार्गावर पिकअप उलटून एक ठार, सहा जण जखमी

हिंगोली : हिंगोली-सेनगाव मार्गावर रिधोरा पाटीजवळ पिकअप उलटून झालेल्या अपघातात एक जण ठार, तर सहा जण जखमी झाल्याची घटना रविवारी (ता.२२) दुपारी घडली. पोलिसांनी दिलेल्या माहितीनुसार विदर्भातील अंजनी बुद्रुक (ता.मेहकर) येथील काही जण पिकअप व्हॅनने रविवारी दुपारी कार्यक्रमासाठी नर्सी नामदेव येथे येत होते. त्यांचे पीकअप व्हॅन हिंगोली (Hingoli) -सेनगाव मार्गावर रिधोरा पाटीजवळ आले असताना चालकाचे वाहनावरील नियंत्रण सुटल्याने पिकअप उलटला. या अपघातात एक जण ठार, तर सहा जण जखमी झाले आहेत.

या अपघाताची माहिती मिळताच नर्सी नामदेव पोलीस ठाण्याचे सहायक पोलिस निरीक्षक अरुण नागरे, सेनगाव पोलिस ठाण्याचे उपनिरीक्षक ठोके, सहायक पोलिस उपनिरीक्षक आर.बी. पोटे, जमादार हेमंत दराडे, जमादार पी.जी. डवले यांच्या पथकाने तातडीने घटनास्थळी धाव घेतली. पोलिसांनी अपघातातील मृत योगेश लाड (वय २२) व जखमी असलेले रामदास श्रीरंग बोरोडे ( ४०), नागेश पायघन (१८), लक्ष्मण पारोडकर (२६) , विष्णू टोणवे (२६) , सुरेखा श्रीकृष्ण पायघन (४५) आकाश संतोष लाड (२६) यांना उपचारासाठी उपप्रादेशिक परिवहन (RTO) अधिकारी माने यांच्या वाहनाने तर काही जणांना रुग्णवाहिकाद्वारे तातडीने हिंगोलीच्या शासकीय रुग्णालयात हलविण्यात आले.

जखमींपैकी दोघांच्या डोक्याला गंभीर दुखापत झाल्याचे वैद्यकीय अधिकाऱ्यांनी सांगितले. या प्रकरणी अद्यापपर्यंत नर्सी नामदेव पोलीस ठाण्यात नोंद झाली नव्हती. दरम्यान हिंगोली-सेनगाव या मार्गावर तीन दिवसांत चार जण ठार, तर सहा जण जखमी झाले आहेत.