Sharad Pawar : शरद पवार मुख्यमंत्री एकनाथ शिंदे यांच्या भेटीला; मुख्यमंत्री तातडीने वर्षा निवासस्थानी दाखल

मुंबईः राष्ट्रवादी काँग्रेसचे अध्यक्ष शरद पवार हे मुख्यमंत्री एकनाथ शिंदे यांच्या भेटीला गेले आहेत. मुख्यमंत्री एकनाथ शिंदे यांच्या वर्षा निवासस्थानी शरद पवार यांनी मुख्यमंत्र्यांशी चर्चा केली.

मागच्या काही दिवसांपासून राज्यात राजकीय घडामोडींना वेग आलेला आहे. आरोप-प्रत्यारोपांच्या फैरी तर सुरुच आहेत. त्यातच शरद पवार अचानकपणे मुख्यमंत्र्यांच्या भेटीला गेल्याने उलटसुलट चर्चा होत आहेत.

विशेष म्हणजे शरद पवार मुख्यमंत्री एकनाथ शिंदे यांच्या भेटीसाठी निघाल्याने एकनाथ शिंदे तातडीने वर्षा निवासस्थानी दाखल झाले. दोघांमध्ये राजकीय विषयावर चर्चा झाल्याची माहिती मिळत आहे. शरद पवारांनी माध्यमांच्या प्रतिनिधींना वर्षा निवासस्थानी बोलावल्याची माहिती आहे.

'वर्षा' निवासस्थानाच्या बाहेर उपस्थित असलेल्या माध्यमांच्या प्रतिनिधींना आतमध्ये बोलावण्यात आल्याची माहिती आहे. कदाचित दोन्ही नेत्यांची संयुक्त पत्रकार परिषद होण्याची शक्यता आहे. माध्यमांचे प्रतिनिधी मुख्यमंत्र्यांच्या निवासस्थानामध्ये दाखल झाले आहेत.