शिवसेनेतील फूट महाराष्ट्राच्या दृष्टीनं योग्य नाही - केसरकर

मुंबई : यापूर्वी उद्धव ठाकरे स्वतः भाजपसोबत युती करण्यासाठी तयार होते आत्ता आम्ही तेच केल आहे तर त्याला तुम्ही विरोध का करता? असा सवाल करत शिवसेनेतील फूट ही महाराष्ट्राच्या दृष्टीनं योग्य नाही, असं विधान शिंदे गटाचे प्रवक्ते दीपक केसरकर यांनी केलं आहे. पत्रकार परिषदेत ते बोलत होते. (split in Shiv Sena is not fair for Maharashtra says Deepak Kesarkar)

केसरकर म्हणाले, "सेना आणि भाजप एकत्र येणार होते याचा मी साक्षीदार आहे. पण तुम्ही केलं तर चांगल आणि आम्ही केलं तर ते वाईट अशी भूमिका घेऊन चालणार नाही. कारण अशा प्रकारे जी शिवसेना बाळासाहेब ठाकरेंनी बांधली, मराठी माणसाच्या हितासाठी उभी केली त्यामध्ये आज जी फूट पडत आहे ती महाराष्ट्राच्या दृष्टीनं योग्य नाही. त्यामुळं जी भूमिका तुम्ही घेतली होती त्यासाठी शिंदे गटाच्या एकाही आमदाराला दुषणं लावली जाता कामा नये, अशी माझी स्पष्ट भूमिका आहे"

जेव्हा जेव्हा नारायण राणे मला भेटले तेव्हा मी त्यांच्याशी आदरपूर्वक वागलो. राणेंशी माझा वैयक्तिक कुठलाही वाद नाही. जिल्ह्याच्या विकासासाठी वेळ आली तरी त्यांच्यासोबतही काम करण्यासाठी तयार आहे. माझ्या विधानाचा संदर्भ थेट राणेंशी जोडला जातो. त्यामुळं ज्याप्रकारे मी शरद पवारांबाबत कोणतही वक्तव्य पत्रकार परिषदेत न करण्याच ठरवलं आहे, त्याचप्रमाणं यापुढे मी राणेंचंही नाव पत्रकार परिषदेत घेणार नाही, असंही यावेळी केसरकर म्हणाले.

मी सार्वजनिक जीवनात काही पथ्ये पाळतो. एखाद्या विषयाच्या अनुषंगानंच बोललं पाहिजे, असं मला वाटतं. माझ्या मुद्द्याचं उत्तर अजूनही शिवसेनेनं द्यावं. महाराष्ट्राच्या जनतेनं देखील शिंदे गट आणि भाजपच्या युतीवर शिक्कामोर्तब केलं आहे. कारण नुकत्याच झालेल्या ग्रामपंचायत निवडणुकीत शिंदे गटाला लोकांनी पंसती दिली. त्यामुळं आता हीच युती पुढील विविध निवडणुकांमध्ये लोकांसमोर जाईल आणि जिंकेलही याची मला खात्री आहे, असं यावेळी दीपक केसरकर यांनी स्पष्ट केलं.