Uddhav Thackeray : ज्यांच्या गळ्यात घंटा बांधली त्यांच्याकडून काय अपेक्षा करणार; ठाकरेंची तोफ धडाडली

मालेगाव - शिवसेना पक्ष आणि पक्षचिन्ह एकनाथ शिंदे गटाला मिळाल्यापासून उद्धव ठाकरे मैदानात उतरले आहेत. उद्धव ठाकरे यांनी याआधी कोकणातील खेड येथे जाहीर सभा घेतली होती. त्यानंतर आज उत्तर महाराष्ट्रातील मालेगावात सभा होत आहे. या सभेत उद्धव यांनी सत्ताधारी शिंदे-फडणवीस सरकारवर जोरदार हल्लाबोल केला.

उद्धव ठाकरे म्हणाले की, कोरोनाच्या काळात मालेगावात मोठ्या प्रमाणात संसर्ग झाला होता. काय करायचं, असा प्रश्न होता. मालेगावकरांनी जे सहकार्य केलं, त्यासाठी सर्वांचे खूप आभार. तुम्ही नाव चोरलं, चिन्ह चोरलं, पक्ष चोरला, पण जीवाभावाची माणसं चोरू शकणार नाहीत.

यावेळी उद्धव ठाकरे यांनी सुहास कांदे यांच्यावर जोरदार हल्ला केला. ठाकरे म्हणाले की, तुम्हाला वाटत असेल कांद्याला बाजार मिळाला नाही. भाव मिळाला नाही, पण मी तसं म्हणत नाही. कांद्याला भाव मिळाला, कांद्याला किंती खोके भाव मिळाला, अशा शब्दात उद्धव यांनी आमदार सुहास कांदे यांच्यावर टीका केली. यावेळी ठाकरे यांनी कांदा उत्पादक शेतकऱ्यांच्या मुद्दावरून शिंदे सरकरावर जोरदार टीका केली.

उद्धव पुढ म्हणाले की, शेतकऱ्यांचे पुत्र असून शेतकऱ्यांकडे दुर्लक्ष केलं. हे काय शेतकऱ्यांचे प्रश्न सोडवणार आहे. ज्यांच्या गळ्यात घंटा बांधली, त्यांच्याकडून काय अपेक्षा करणार असा खोचक सवाल उद्धव ठाकरे यांनी मुख्यमंत्री एकनाथ शिंदे याचं नाव न घेता उपस्थित केला.