संजय निरूपम म्हणाले, 'पक्षाला सोडचिठ्ठी देण्याचा दिवस लांब नाही'!

मुंबई : विधानसभा निवडणुकीसाठी शुक्रवारपर्यंत (ता.4) अर्ज करण्याची मुदत आहे. जवळजवळ सर्वच पक्षांनी आपापले उमेदवार जाहीर केले असून अजून काहीजण उद्या दुपारपर्यंत आपले उमेदवारीचे अर्ज भरणार आहेत. 

यावेळेस काही नव्या चेहऱ्यांना सर्व पक्षांनी संधी दिली असून जुन्या चेहऱ्यांना डच्चूही दिला आहे. त्यामुळे सध्या सर्वच पक्षांमध्ये प्रस्थापितांच्या नाराजीबाबतची चर्चा सगळीकडे होत आहे. याला काँग्रेसदेखील अपवाद ठरला नाही.

काँग्रेसचे फायरब्रँण्ड मुंबई अध्यक्ष आणि माजी खासदार संजय निरूपम यांनी अखेर काँग्रेसच्या प्रचारातून बाहेर पडण्याचा इशारा दिला आहे. सध्या काँग्रेसमधे जे सुरू आहे, ते अनाकलनिय असून निवडणुका लढण्याची काँग्रेसची इच्छाचं हरवली असल्याची अगतिकता निरूपम यांनी व्यक्त केली आहे.

पक्षाची वाताहत सुरू असतानाही पक्षाचे नेते दरबारी राजकारणातून बाहेर पडत नाहीत. स्थानिक समीकरणं समजून उमेदवारी देत नाहीत, असा आरोप करत यावेळी काँग्रेसच्या प्रचारात उतरणार नसल्याची घोषणाच निरूपम यांनी केली आहे.

काँग्रेसचा माजी मुंबई अध्यक्ष आणि माजी खासदार असताना केवळ एका विधानसभेसाठी समर्थकाला उमेदवारी द्यावी, अशी विनंती संजय निरूपम यांनी केली होती. मात्र, ती विनंती काँग्रेसने डावलल्याने व्यथित झाल्याचे ट्विट निरूपम यांनी केले आहे. यामुळे मुंबई काँग्रेसमध्ये नव्या वादाला फोडणी मिळाली असून अनेक काँग्रेस नेते नाऊमेद झाल्याची चर्चा रंगली आहे.

याप्रकारची वागणूक पक्षाकडून मिळाल्याने संजय निरुपम कमालीचे नाराज झाले आहेत. पक्षाला सोडचिठ्ठी देण्याचा दिवस लांब नसल्याचा मनोदयही त्यांनी व्यक्त केला आहे. हा सूचक इशारा काँग्रेस किती गांभीर्याने घेतं याकडे सर्व राजकीय वर्तुळाचं लक्ष आहे.

वाचा आणखी महत्त्वाच्या बातम्या :

- Vidhan Sabha 2019 : पवारांचे नातू रोहित पवार यांची आहे 'एवढी' संपत्ती

- Vidhan Sabha 2019 : तीन कोटींच्या गाड्या, 22 कोटींचे शेअर्स; उमेदवाराचं वय 29!

- Vidhan Sabha 2019 : शिवसेनेची मोठी खेळी; आव्हाडांच्या विरोधात 'ही' अभिनेत्री रिंगणात