दाक्षिणात्य सिनेमातील खलनायक एनडी प्रसादची घरात गळफास घेऊन आत्महत्या

मॉलीवूड अभिनेता(Mollywood Actor) एनडी प्रसाद(ND Prasad),मल्याळम सिनेमात छोट्या-मोठ्या अनेक भूमिका करण्यासाठी ओळखला जायचा,त्यानं राहत्या घरात गळफास लावून आत्महत्या केल्याचं वृत्त आहे. रविवारी २६ जून रोजी सुमारे संध्याकाळी ७.३० च्या सुमारास त्यानं गळफास लावून घेतल्याचं तपासात समोर आलं आहे. त्याच्या घराच्या आवारात असलेल्या झाडाला त्यानं फास लावून घेतला. कोची शहरातील Kalamssery भागात त्याचं घर आहे. (actor Prasad found hanging at his residence)

एनडी प्रसाद हा ४३ वर्षांचा होता. प्रसादच्या पश्चात त्याची पत्नी आणि दोन मुलं असा परिवार आहे. पोलिसांनी प्राथमिक तपासात प्रसादच्या आत्महत्येच कारण हे मानसिक तणाव आणि कौटुंबिक कलह सांगितले आहेत.

पोलिसांच्या म्हणण्यानुसार अभिनेत्याला याआधी अनेकवेळा पोलिसांनी वेगवेगळ्या कारणांसाठी अटक केली होती. ड्रग्ज केसमध्ये देखील पोलिसांनी त्याला जेरबंद केलं होतं. गेल्या वर्षी एर्नाकुलम येथून प्रसादला २.५ ग्रॅम हाशिश ऑइल, १५ ग्रॅम गांजा अशा विविध ड्रग्ज साठ्यांसोबत पकडलं होतं. प्रसाद विरोधात अनेक पोलिस ठाण्यात वेगवेगळ्या केसेस सध्या सुरु आहेत,ज्यांचा तपास अद्यापही सुरु आहे.