'महाराष्ट्राची जनता जिंकली'; उद्धव ठाकरेंच्या राजीनाम्यानंतर अभिनेत्याचं ट्वीट

उद्धव ठाकरे यांनी (Uddhav Thackeray Resigns) मुख्यमंत्रिपदाचा आणि आमदारकीचा राजीनामा दिलाय. बुधवारी रात्री साडेनऊ वाजता त्यांनी त्यांच्या राजीनाम्याची घोषणा केली. त्यानंतर रात्री साडेअकरा वाजता त्यांनी राज्यपाल भगतसिंह कोश्यारी (Governor Bhagat Singh Koshyari) यांची भेट घेऊन त्यांचा राजीनामा सुपूर्द केलाय. त्यामुळं एकनाथ शिंदेंच्या (Eknath Shinde) बंडाचा आता दुसरा अंक सुरू होणार आहे.

बुधवारी सुप्रीम कोर्टानं (Supreme Court) दिलेल्या निर्णयानंतर त्यांनी राजीनाम्याचा निर्णय घेतला. दरम्यान, आता उद्धव ठाकरेंनी मुख्यमंत्री पदाचा राजीनामा दिल्यानंतर सोशल मीडियावर सामान्य जनतेसह सेलिब्रिटींनी प्रतिक्रिया व्यक्त केल्या आहेत. हा सत्तासंघर्ष सुरू असताना अनेक घडामोडींवर ट्वीटद्वारे सतत प्रतिक्रिया देणारा अभिनेता आरोह वेलणकर (Actor Aroh Welankar) यानं मुख्यमंत्र्यांच्या राजीनाम्यानंतर ट्वीट केलंय.

'महाराष्ट्राची जनता जिंकली' असं ट्वीट आरोहनं केलंय. हे ट्वीट केल्यानंतर त्याला अनेकांनी पाठिंबा दिलाय, तर बऱ्याच जणांनी त्याला ट्रोल देखील केलंय. याआधी अभिनेता आरोह वेलणकर एका मुलाखतीमध्ये म्हणाला होता, की शिवसेनेनं (Shiv Sena) एकनाथ शिंदे यांना मोठं केलं असं वारंवार बोललं जात आहे. मग, एकनाथ शिंदे यांनीही शिवसेनेसाठी खूप काही केलं आहे, याची जाणीव शिवसेनेला असायला हवी. आज ठाण्यात शिवसेना आहे, ती केवळ एकनाथ शिंदे यांच्यामुळं आहे. त्यामुळं त्यानींही शिवसेनेला भरभरून दिलंय, असं आरोह म्हणाला.

उद्धव ठाकरे काय म्हणाले?

आपल्या सर्वांच्या सहकार्यानं वाटचाल केली. सरकार म्हणून छत्रपती शिवरायांच्या रायगडला निधी देऊन कामाला सुरुवात केली. शेतकऱ्यांना कर्जमाफी दिली, त्यांना कर्जाच्या अडचणीतून बाहेर काढण्यासाठी प्रयत्न केले, असं उद्धव ठाकरे म्हणाले. शेतकऱ्यांसाठी पीक विमा योजनेचा बीड पॅटर्न सुरु केला. बाळासाहेब ठाकरेंचं स्वप्न होतं, ते औरंगाबादचं संभाजीनगर असं नामांतर केलं. उस्मानाबादचं धाराशीव असं नामांतर केलं. सर्व चांगलं सुरु असताना काही जणांची नजर लागली. आज राष्ट्रवादी काँग्रेसचे शरद पवार आणि काँग्रेसचे सोनिया गांधी यांचे आभार मानतो, असं उद्धव ठाकरे म्हणाले.