'बधाई दो' सिनेमाचा ट्रेलर एकदा पहाच;हसून हसून पुरती वाट लागेल

कोरोनानं सर्वजण बेजार झाले आहेत. अशात मनोरंजनासाठी थिएटरचा पर्याय निवडायचा तर तिथे खूप कमी सिनेमे प्रदर्शित होत आहेत. कारण बऱ्याच निर्मात्यांनी कोरोनाच्या नवीन नियमावलीमुळे आपल्या सिनेमांचं प्रदर्शन पुढे ढकललं आहे. काहींनी ओटीटीचा पर्याय निवडून तिथे आपले सिनेमे प्रदर्शित केले. पण राजकुमार राव(Rajkummar Rao) आणि भूमी पेडणेकर(Bhumi Pednekar) यांचा 'बधाई दो' सिनेमा मात्र थिएटरमध्येच प्रदर्शित होणार असल्याचं निर्मात्यांनी जाहिर केलं होतं. आता हा सिनेमा ११ फेब्रुवारीला सिनेमागृहात प्रदर्शित केला जाणार आहे. नुकताच या सिनेमाचा ट्रेलर रीलीज करण्यात आला आहे. आणि काही तासातच सोशल मीडियावर या सिनेमाच्या ट्रेलरला चांगलीच पसंती मिळाल्याचं दिसून आले आहे. या सिनेमाता राजकुमार राव पोलिस ऑफिसरच्या भूमिकेत तर भूमी पेडणेकर पी.टी टीचरच्या भूमिकेत पहायला मिळणार आहे.

या सिनेमाचा ट्रेलर पाहून काही अंदाज मात्र लावले जात आहेत. ते असे की,सिनेमात भूमीनं साकारलेल्या व्यक्तिरेखेला मुलांमध्ये रस नाही आहे. त्यामुळे तिला लग्नच करायच नाहीय. आईवडील खूप मागे लागूनही ती वारंवार लग्नाला विरोध करतेय. पण अशातच तब्बल चार वर्षांपासून तिच्याशी लग्न करण्यासाठी उत्सुक असलेला पोलिस ऑफिसर,जी भूमिका राजकुमार रावने साकारली आहे,तो अखेर तिला लग्नासाठी तयार करतोच. दोघांमध्ये एक गोष्ट संगन मताने ठरवली जाते आणि मग लग्नाचा निर्णय होतो. आता ट्रेलरमध्ये तरी दिसतंय भूमी पेडणेकरने एका लेस्बियन मुलीची व्यक्तीरेखा साकारली आहे. पण इथेही कहानीमध्ये काहीतरी ट्वीस्ट आहे. सिनेमाला छान विनोदी तडका देण्यात आलेला आहे.

या सिनेमाचं दिग्दर्शन हर्षवर्धन कुलकर्णीनं केलं आहे तर विनित जैन यांची निर्मिती आहे. भूमी आणि राजकुमारनं आपल्या सोशल मीडियावर सिनेमाचे पोस्टर-ट्रेलर पोस्ट करून सिनेमासाठी आपण उत्सुक असल्याचं सांगितलं आहे. राजकुमार आणि भूमी दोघंही कसलेले कलाकार आहेत त्यामुळे 'बधाई दो' सिनेमातून त्यांच्या अभिनयाची जुगलबंदी पाहणं प्रेक्षकांसाठी मनोरंजनाची मेजवानी असणार हे मात्र नक्की. हा सिनेमा खरं तर २६ जानेवारीला प्रदर्शित होणार होता. असो,आता ११ फ्रेबुवारीला सिनेमागृहात भेटायला येतोय यापेक्षा आनंदाची दुसरी गोष्ट कोणती असेल.