प्रदर्शनाच्या दिवशीच '83'वर बंदीची मागणी; काय आहे कारण?

२५ जून १९८३ हा दिवस भारतीय क्रिकेटप्रमी कधीच विसरू शकत नाहीत. या दिवशी कपिल देवच्या नेतृत्वाखाली भारतीय संघाने विश्वकरंडक जिंकला होता. क्रिकेटची पंढरी समजल्या जाणाऱ्या लॉर्ड्सवर वेस्ट इंडिजसारख्या बलाढ्य संघाला भारतीय क्रिकेट संघाने चारी मुंड्या चीत केले होते. तमाम भारतीयांची मान अभिमानाने उंचावेल अशी ही कामगिरी होती. याच विजयगाथेवर '83' हा बहुप्रतिक्षित चित्रपट आज (२४ डिसेंबर) प्रदर्शित झाला. मात्र प्रदर्शनाच्या दिवशीच या चित्रपटावर बंदीची मागणी होतेय. ट्विटरवर 'Boycott 83' असा हॅशटॅग जोरदार ट्रेंड होतोय. कबीर खान दिग्दर्शित हा चित्रपट बॉक्स ऑफिसवर सुपरफ्लॉप ठरावा, अशी मागणी नेटकरी करतायत. (83 Movie)

नेमकं काय आहे कारण?

या चित्रपटात रणवीर सिंग हा कपिल देव यांची तर दीपिका पदुकोण ही त्यांची पत्नी रुमी यांची भूमिका साकारतेय. दीपिका या चित्रपटाची निर्मातीसुद्धा आहे. जेव्हापासून दीपिकाने जेएनयूच्या विद्यार्थ्यांच्या समर्थनार्थ हात पुढे होता, तेव्हापासून लोकांमध्ये तिच्याबद्दल नाराजी दिसून येत आहे. दीपिकाच्या प्रॉडक्शनने 'तुकडे-तुकडे गँग'ला पाठिंबा दिल्याचं सांगून लोकांना हा चित्रपट न पाहण्याचं आवाहन केलं जात आहे. दीपिकाचा 'छपाक' चित्रपट प्रदर्शित होत असतानाही लोकांनी अशाच पद्धतीने राग व्यक्त केला होता. लोकांनी या चित्रपटावरही बहिष्कार टाकण्याची मागणी केली होती.

काही नेटकऱ्यांनी कबीर खान, रणवीर सिंग यांच्यावरही विविध आरोप करत चित्रपटावर बहिष्कार टाकण्याची मागणी केली आहे. या चित्रपटात पंकज त्रिपाठी, ताहिर राज भसीन, जिवा, साकिब सलीम, जतीन सरना, चिराग पाटील, दिनकर शर्मा, निशांत दहिया, हार्डी संधू, साहिल खट्टर आणि एमी विर्क अशी कलाकारांची मोठी फौज आहे.