विवियनची तुलना नाना पाटेकरांशी; नीना गुप्तांनी आशा भोसलेंना दिलं असं उत्तर

अभिनेत्री नीना गुप्ता Neena Gupta यांनी बॉलिवूडमध्ये काही दमदार भूमिका साकारल्या. अभिनयाच्या कारकिर्दीसोबतच नीना त्यांच्या खासगी आयुष्यामुळे खूप चर्चेत राहिल्या. क्रिकेटर विवियन रिचर्ड्ससोबतचं Vivian Richards त्यांचं नातं फारच चर्चेत होतं. या दोघांना मसाबा ही मुलगी आहे. पण विवियनने नीना यांच्याशी लग्न केलं नाही. नीना यांनी एकटीनेच मसाबाचं संगोपन केलं. नुकत्याच प्रकाशित झालेल्या 'सच कहूँ तो' या आत्मचरित्रात नीना यांनी त्यांच्या करिअर आणि खासगी आयुष्याविषयी बरेच खुलासे केले आहेत. या आत्मचरित्रात त्यांनी एका बॉलिवूड इव्हेंटमध्ये घडलेला किस्सा सांगितला. विवियन रिचर्डसोबत नीना यांनी बॉलिवूडमधील एका कार्यक्रमाला हजेरी लावली होती. (Here is how Neena Gupta reacted when Asha Bhosle felt Vivian Richards looks like Nana Patekar)

यावेळी विवियनला भेटल्यानंतर गायिका आशा भोसलेंनी त्याची तुलना अभिनेते नाना पाटेकर यांच्याशी केली. यावर नीना यांनी उत्तर दिलं होतं, 'तो (विवियन) नानांपेक्षा चांगला दिसतो.' यावेळी आशा यांनी नाना पाटेकर यांना भेटलीस का, असा प्रश्न नीना यांना विचारला. त्यावर नीना यांनी नकारार्थी उत्तर दिलं. या कार्यक्रमात नीना आणि विवियन यांनी सर्वांचं लक्ष वेधून घेतलं होतं.

नीना गुप्ता आणि विवियन रिचर्ड्स यांचं रिलेशनशिप ८०च्या दशकात फार चर्चेत होतं. या दोघांनी लग्न केलं नाही. नीना यांनीच मसाबाला लहानाचं मोठं केलं. मसाबासाठी नीना आणि विवियन यांनी नेहमीच काही कार्यक्रमांमध्ये एकत्र हजेरी लावली होती. मसाबा हे नाव सध्या फॅशन विश्वातील फार प्रसिद्ध नाव आहे. बॉलिवूड इंडस्ट्रीतील मोठमोठ्या कलाकारांसाठी ती फॅशन डिझायनिंग करत असून 'हाऊस ऑफ मसाबा' या नावाने तिचा स्वत:चा फॅशन ब्रँडसुद्धा आहे.