आर्यन खान प्रकरणावर जावेद अख्तर यांचं कठोर भाष्य; म्हणाले...

मुंबई : कॅडिलिया क्रूझ रेव्ह पार्टी अर्थात आर्यन खान प्रकरणावर प्रसिद्ध गीतकार जावेद अख्तर यांनी कठोर भाष्य केलं आहे. आर्यन खानवर ज्या प्रकारे कारवाई करण्यात आली त्यावरुन त्यांनी अनेक प्रश्न उपस्थित केले आहेत. तसेच बॉलिवूडला अशी किंमत का मोजावी लागतेय याची कारणंही सांगितली आहेत.

काय म्हणालेत जावेद अख्तर?

"एका बंदरावर (अदानी पोर्ट) एक १ अब्ज डॉलरचं कोकेन आढळून आलं तर दुसऱ्या एका ठिकाणी (क्रूझ) बाराशे लोक उपस्थित असताना त्यांच्याजवळ मिळून १ लाख ३० हजार रुपयांचं गांजा आढळतो. पण यामध्ये दुसऱ्या ठिकाणची बातमी मोठी राष्ट्रीय बातमी होते. पण १ अब्ज डॉलरच्या कोकेनच्या बातमीची मी हेडलाईनही पाहिली नाही. वर्तमानपत्रात पाचव्या-सहाव्या पानावर याबाबत छोटीशी बातमी येते. तसेच बंदराचं प्रशासनं म्हणतं की, आम्ही आता संबंधित देशातून या ठिकाणी जहाजचं येऊ देणार नाही. पण तुमच्या बंदरात जे सापडलंय त्यावर आधी काही सांगणार का? या सगळ्यावरुन हेच दिसून येतं की, फिल्म इंडस्ट्रीला आपल्या हायप्रोफाईल असण्याची किंमत मोजावी लागते आहे," असं जावेद अख्तर यांनी एका कार्यक्रमादरम्यान माध्यमांशी बोलताना म्हटलं.

आपण जेव्हा हायप्रोफाईल असता तेव्हा लोकांना तुम्हाला खाली ओढण्यात, तुमच्यावर दगड फेकण्यात, तुमच्यावर चिकलफेक करण्यात मजा येत असते. जर तुम्ही कोणीच नसाल तर कोणाला वेळ आहे तुमच्यावर त्यांनी दगड फेकण्यासाठी? असंही अख्तर यावेळी म्हणाले.