'अजय माझा फक्त नावाला नवरा';काजोलचं काय बिनसलं?

काजोल(Kajol) आणि अजय देवगण(Ajay Devgan) हे बॉलीवूड(Bollywood) मधलं तसं खूप मॅच्युअर्ड कपल म्हणता येईल. कधी हे दोघे फार चार-चौघात हसता-खिदळताना दिसत नाहीत,ना कुठल्या फंक्शनमध्ये हातात-हात घालून मिरवताना दिसतात ना कधी एकमेकांसोबतचे रोमॅंटिक फोटो शेअर करताना दिसतात. पण यांचा सुखा-सुखी चाललेला संसार मात्र यांच्यात सगळं आलबेल आहे याची खूणगाठ बांधतो. पण आता सोशल मीडियावर अजयसंदर्भात काजोलनं जे काही पोस्टमध्ये म्हटलं आहे त्यावरुन चर्चेला मात्र सुरुवात झाली आहे.

सुरुवातीला आम्ही हे स्पष्ट करतो की ती काजोलनं केलेली पोस्ट थोडी मजेदार आहे. आणि ती पोस्ट तिनं तिच्या सासूच्या संदर्भात केली आहे. म्हणजे सासू आणि तिच्या नात्याविषयी थोडक्यात तिनं सांगितलं आहे,तेव्हा अजयवरनं तिनं एक जोक मारला आहे. काजोलनं ही पोस्ट तिच्या सासूच्या वाढदिवसानिमित्तानं केली आहे. ज्यात तिनं सासूला वाढदिवसाच्या शुभेच्छा देताना त्या दोघींच्या नात्याविषयी छान लिहिलंही आहे. तिनं दोघींचा छान फोटो पोस्ट केला आहे. ज्यात काजोलनं व्हाईट आणि गोल्डन रंगाची साडी नेसली आहे तर तिच्या सासूने पिवळ्या रंगाचा पंजाबी ड्रेस घातला आहे. तिनं तिच्या पोस्टमध्ये लिहिलंय,''जेव्हा तुम्ही एका पुरुषासोबत लग्न करता,तेव्हा त्याच्यासोबत त्याचं कुटुंब हे देखील तुमच्या आयुष्यात येतं. असंच आमच्या कुटुंबातील माझ्या आवडत्या व्यक्तीचा आज वाढदिवस आहे,जो कायम माझ्यासोबत असतो,ती म्हणजे माझी सासूबाई. आणि अनेकदा मला वाटतं मी अजयपेक्षा माझ्या सासूशीच लग्न केलं आहे. मला त्या माझ्या नवऱ्याच्या जागी वाटतात. इतक्या त्या माझी काळजी घेतात,माझे लाड करतात. हॅप्पी हॅप्पी बर्थ डे टू वीणा देवगण''.

या काजोलच्या पोस्टवर तिच्या चाहत्यानं लिहिलंय,'सो क्यूट. सासू-सूना एकत्र खूप छान दिसत आहात'. तर दुसरा एकजण म्हणाला आहे,'काजोल तुम्ही दोघी खूप छान दिसत आहात. वीकेन्डला एक छान विचार देऊन आमचं मन प्रसन्न केलंस'. अजय देवगणनेही मागे एका मुलाखतीत सांगितलं होतं की,''माझ्यापेक्षा जास्त काजोल माझ्या आईसोबत वेळ घालवणं पसंत करते,काजोलला माझ्या आईची कंपनी अधिक आवडते. तिला आईसोबत अधिक सुरक्षित वाटतं''. काजोलला आपण नेटफ्लिक्सच्या 'त्रिभंगा' वेबसीरीजमध्ये पाहिलं होतं. २०२१ सालात ती सीरीज आपल्या भेटीस आली होती. तर सिनेमागृहात शेवटचा तिचा पाहिलेला सिनेमा हा २०२० मध्ये प्रदर्शित झालेला 'तान्हाजी'. या सिनेमात अजय देवगणने 'तान्हाजी' ही मध्यवर्ती भूमिका साकारली होती, तर त्याच्या बायकोची म्हणजे सावित्रीबाई मालुसरेची भूमिका काजोलने साकारली होती. हा सिनेमा सुपरहीट ठरला होता. काजोल लवकरच आपल्याला 'सलाम वेंकी' मध्ये दिसणार आहे.