पाकिस्तान ते अमेरिका! लतादीदींना आंतरराष्ट्रीय स्तरावर कुणी कशी वाहिली श्रद्धांजली

मुंबई: गाणसम्राज्ञी लता मंगेशकर (Lata Mangeshkar demise) यांचं आज रविवारी 92 व्या वर्षी निधन झालं. त्यांच्या जाण्यानंतर सर्वच स्तरातून हळहळ व्यक्त होत आहे. भारतातील बॉलिवूड क्षेत्रासहितच राजकीय, क्रीडा, कला अशा सर्वच स्तरातून शोक व्यक्त केला जात आहे. त्यांच्या जाण्यानंतर आंतरराष्ट्रीय स्तरावरुन देखील शोक व्यक्त केला जातो आहे.

शेजारील राष्ट्र नेपाळ, पाकीस्तान तसेच अमेरिका, इस्रायल आणि इतर अनेक देशांतून लता मंगेशकर यांना श्रद्धांजली वाहण्यात आली आहे.

पाकिस्तानचे माहिती आणि तंत्रज्ञान मंत्री फवाद चौधरी यांनी लता मंगेशकर यांना श्रद्धांजली वाहिली आहे. त्यांनी म्हटलंय की, त्यांच्या आवाजाची जादू कायमस्वरुपी राहिल. पुढे त्यांनी म्हटलंय की, लता मंगेशकर या गोड गळ्याच्या गाणसम्राज्ञी होत्या, ज्यांनी अनेक दशके संगीत क्षेत्रावर अधिराज्य गाजवलं. ताज नसलेल्या त्या सम्राज्ञीच होत्या. त्यांचं गाणं येणाऱ्या काळातही लोकांच्या हृदयावर असंच अधिराज्य गाजवत राहिल.

दुसरीकडे भारतातील अमेरिकेच्या राजदूतांनीही ट्विटरवर म्हटलंय की, वयाच्या 92 वर्षी वारलेल्या लता मंगेशकर यांना आम्ही आदरांजली वाहत आहोत. इतिहास त्यांचं नाव भारताच्या संगीत क्षेत्रामध्ये सुवर्ण अक्षरांनी कोरेल.

नेपाळच्या राष्ट्रपती बिद्या देवी भंडारी यांनी लता मंगेशकर यांच्या निधनावर दु:ख व्यक्त केलं आहे. त्यांनी ट्विट करत म्हटलंय की, अनेक नेपाळी गाण्यांना आपल्या सुरेल आवाजाने सजवणाऱ्या प्रसिद्ध भारतीय गायिका लता मंगेशकर यांच्या निधनाच्या वृत्ताने मला दु:ख झाले आहे. असाधारण प्रतिभेने संपन्न असलेल्या स्वर्गीय लता मंगेशकर यांना मी भावपूर्ण श्रद्धांजली अर्पण करते.

दुसरीकडे पाकिस्तान क्रिकेट संघाचा कप्तान बाबर आझमनेही ट्विट करत लता मंगेशकर यांच्या जाण्याबद्दल शोक व्यक्त केला आहे. त्याने ट्विट करत म्हटलंय की, एका सुवर्ण युगाचा अंत झाला आहे. त्यांचा जादुई आवाज आणि त्यांचा वारसा जगभरातील लाखो लोकांच्या हृदयात जिवंत राहील. एक अतुलनीय व्यक्तीमत्त्व! श्रीमती लता मंगेशकरजी यांना श्रद्धांजली, असं त्याने म्हटलंय.