Harnaaz sandhu : पोलिसांच्या कुटुंबियांसोबत नाचली मिस युनिव्हर्स हरनाझ संधू..

जागतिक स्तरावर महत्वाच्या मानल्या जाणाऱ्या मिस युनिव्हर्सचा किताब मिळवणारी हरनाझ संधू (harnaaz sandhu) गेल्या काही दिवसात चांगलीच प्रकाशझोतात आली आहे. तिच्या या विजयाने देशाची मान अभिमानाने उंचावली असून ती सध्या भारतातील नोएडामध्ये आहे. इंडो-तिबेट बॉर्डर पोलिसांनी (आयटीबीपी) ग्रेटर नोएडामध्ये आयोजित केलेल्या महिला सक्षमीकरणाच्या खास कार्यक्रमात तिने हजेरी लावली होती. यावेळी हरनाझने आयटीबीपी पोलिसांचे, त्यांच्या कार्याचे भरभरून कौतुक केले.

या कार्यक्रमानंतर पोलिसांचे कुटुंबीय पंजाबी गाण्यांच्या तालावर थिरकत होते. यावेळी हरनाझ संधू देखील त्यांच्या आनंदात सामील झाली. याचा एक सुंदर व्हिडीओ आयटीबीपीने त्यांच्या अधिकृत इंस्टाग्रामवर अकाऊंटवरून पोस्ट केला आहे. ज्यामध्ये मिस युनिव्हर्स हरनाज संधू पोलिसांच्या कुटुंबियांसोबत धमाल करताना दिसत आहे. पंजाबी गाण्यांवर संधू आणि पोलिसांचे कुटुंबीय दिलखुलासपणे नाचत आहेत.

हा व्हिडिओ शेअर करताना आयटीबीपीने लिहिले आहे, 'मिस युनिव्हर्स २०२१ हरनाज कौर संधू आज महिला सक्षमीकरण आणि 'एचडब्ल्यूडब्ल्यूए' च्या स्थापना दिनानिमित्त आयोजित एका विशेष कार्यक्रमात ३९ व्या बटालियन आयटीबीपी ग्रेटर नोएडा येथे उपस्थित राहिली तसेच पोलिसांच्या कुटुंबियांच्या आनंदात ती सहभागी झाली,'

देशाच्या बर्फाळ सीमेवर तैनात असलेले आयटीबीपीचे जवान कठीण प्रसंगांना कसे तोंड देतात याविषयी हरनाझ भरभरून बोलली. तसेच महिला सक्षमीकरणावरही तिने भाष्य केले, अशी माहिती काही माध्यमांनी दिली आहे. संधूच्या या कामगिरीवर चाहते अत्यंत खुश असून प्रतिक्रिया आणि प्रेमाचा वर्षाव करत आहेत.