निळू फुलेंवर येणार चित्रपट! 'हा' अभिनेता करणार दिग्दर्शन

मराठी चित्रपट सृष्टीतील खलनायक म्हणून दिवंगत निळू फुले यांना खूपच लोकप्रियता मिळाली. त्यांनी अनेक मराठी, हिंदी चित्रपटातून उत्तम खलनायक रंगवला. त्या निळू फुलेंचा आज वाढदिवस. या वाढदिवसाच्या निमित्ताने एका प्रसिद्ध अभिनेत्यांने त्यांच्यावर चित्रपट दिग्दर्शित करणार असल्याची घोषणा केली आहे.

सध्या चंद्रमुखी या चित्रपटाची खूप चर्चा आहे. या चित्रपटाचा दिग्दर्शक आणि प्रसिद्ध अभिनेता प्रसाद ओक याने सोशल मीडियावर या संदर्भात माहिती दिली आहे. इंस्टाग्रामवर पोस्ट केलेल्या फोटोत प्रसाद ओक म्हणतो, की निळूभाऊ... आज तुमचा वाढदिवस...!!! तुमच्या सहवासातली ती दोन अडीच वर्ष माझ्या आयुष्यातली सर्वात अविस्मरणीय होती भाऊ. तुम्हाला खूप जवळून पाहता आलं...अनुभवता आलं... तुमच्याकडून बरंच काही शिकलो... तुम्हाला न सांगता तुम्हाला मनोमन "गुरु" च मानलं... तुमचा आशीर्वाद म्हणूनच कि काय तुमच्यावरचा जीवनपट दिग्दर्शित करण्याची संधी मला मिळाली आहे. तो फक्त एक चित्रपट नसेल तर मी तुम्हाला दिलेली "गुरुदक्षिणा" असेल...!!! फक्त पाठीवर तुमचा हात कायम राहू द्या भाऊ...!!!

चंद्रमुखी या चित्रपटाची उत्सुकता शिगेला पोहोचली असताना प्रसाद ओक निळू फुलेंवर चित्रपट करणार असल्याने निळू फुले यांचे चाहते खूश झाले आहेत. अनेकांनी प्रसाद ओक यांना चित्रपटासाठी शुभेच्छा दिल्या आहेत. या चित्रपटाचे शूटींग कधी सुरू होईल याविषयी अद्याप कोणतीही घोषणा झालेली नाही.