..तर 'पुष्पा'च्या क्लायमॅक्समध्ये असता अल्लू अर्जुनचा न्यूड सीन

'स्टायलिश स्टार' म्हणून ओळखल्या जाणाऱ्या अल्लू अर्जुनचा (Allu Arjun) 'पुष्पा' (Pushpa) हा चित्रपट सध्या बॉक्स ऑफिसवर चांगली कमाई करतोय. या चित्रपटाला प्रेक्षक-समीक्षकांकडून संमिश्र प्रतिसाद मिळतोय. प्रसिद्ध अभिनेत्री समंथा रुथ प्रभूच्या करिअरमधील पहिला आयटम साँग या चित्रपटात आहे. चित्रपटातील इतरही काही दृश्यांची चर्चा सोशल मीडियावर होतेय. अशातच या चित्रपटाचे दिग्दर्शक सुकुमार यांनी क्लायमॅक्सबाबत खुलासा केला आहे. 'पुष्पा: द राईज' या चित्रपटाच्या क्लायमॅक्समध्ये अल्लू अर्जुन आणि फहाध फासिल यांच्या न्यूड सीनचा विचार होता. मात्र नंतर माघार घेतल्याचं दिग्दर्शकांनी स्पष्ट केलं. 'तेलुगू प्रेक्षकांनी त्या सीनचा प्रचंड विरोध केला असता आणि परिणामी चित्रपटाला त्याचा फटका बसला असता', म्हणून क्लायमॅक्स सीनमध्ये बदल केल्याचं सुकुमार यांनी सांगितलं.

"अल्लू अर्जुन आणि फहाध यांचा क्लायमॅक्समध्ये न्यूड सीन होता. मात्र ते तेलुगू प्रेक्षकांच्या विरोधात गेलं असतं", असं सुकुमार म्हणाले. चित्रपटात अल्लू अर्जुन आणि रश्मिका मंदाना यांच्या मुख्य भूमिका आहेत. या दोघांच्या इंटिमेट सीनलाही अनेकांनी विरोध केल्याचं पहायला मिळालं. काही प्रेक्षकांनी हा सीन चित्रपटातून काढून टाकण्याचीही मागणी केली आहे.

'पुष्पा' या चित्रपटाने गेल्या नऊ दिवसांत ३२.९५ कोटी रुपयांचा (हिंदी भाषेतील कमाई) गल्ला जमवला आहे. या चित्रपटाचा दुसरा भागसुद्धा लवकरच प्रदर्शित होणार आहे. लाल चंदनच्या तस्करीवर आधारित या चित्रपटाची कथा आहे. ‘पुष्पा’ हा चित्रपट तेलुगू, तमिळ, हिंदी, कन्नड आणि मल्याळम या भाषांमध्ये प्रदर्शित झाला आहे. या चित्रपटात अल्लू अर्जुन 'रफ अँड टफ' लूकमध्ये पहायला मिळतोय.