सुशांत राहत असलेल्या मुंबईतील फ्लॅटचं भाडं इतके लाख रुपये

दिवंगत अभिनेता सुशांत सिंह राजपूत Sushant Singh Rajput राहत असलेल्या मुंबईतील वांद्रे इथलं घर लवकरच भाडेतत्त्वावर देण्यात येणार आहे. या घरात राहण्यासाठी सुशांत दरमहा किती भाडं भरायचा, याची माहिती नुकतीच रिअल इस्टेट फर्मने दिली आहे. १४ जून २०२० रोजी याच घरात सुशांतचा मृतदेह आढळला होता. सध्या या प्रकरणाचा तपास सीबीआय करत आहे. इतके दिवस हे घर कोणालाच भाडेतत्त्वावर राहायला दिलं नव्हतं. कोरोना महामारी आणि लॉकडाउनमुळे कोणी फारशी विचारणाही केली नव्हती. (Sushant Singh Rajputs sea facing Mumbai home is up for this much rent)

या घरात राहण्यासाठी भाडेकरूला चार लाख रुपये प्रति महिना भाडं द्यावं लागेल. सुशांतने डिसेंबर २०१९ मध्ये हे घर साडेचार लाख रुपये प्रतिमहिना भाडेतत्त्वावर घेतलं होतं. डिसेंबर २०२२ पर्यंत त्याचा घरमालकांशी करार होता. या घरात तो रुममेट आणि गर्लफ्रेंड रिया चक्रवर्तीसोबत राहत होता.

सुशांतच्या मृत्यूमुळे अनेकांनी या घरात राहण्यात नकार दिल्याचीही माहिती ब्रोकरने दिली. 'काहींनी घराच्या भाडेविषयी चर्चा केली, पण सुशांतबद्दल समजताच त्यांनी माघार घेतली', असं ते म्हणाले. मात्र लॉकडाउननंतर पुन्हा एकदा हा सी-व्ह्यू अपार्टमेंट भाडेतत्त्वावर देणार असल्याचं त्यांनी सांगितलं.