वडिलांचा मृतदेह घरात होता..तीने धैर्याने परिक्षा दिली; यश मिळविले, पण बाबा तू हवा होतास...

जलील पठाण
रविवार, 2 ऑगस्ट 2020


वडिलांचा मृतदेह घरात होता. त्याच दिवशी इंग्रजीचा पेपर होता. धैर्याने परिक्षेला गेली. त्याच विषयात 70 गुण मिळविले. नंतर घरी येऊन बाबांचे अंत्यसंस्कार केले. पुढचे विषय देखील तिने हिमतीने आणि जिद्दीने दिले. नुकताच दहावीचा निकाल लागला. आणि तिने यश मिळविले. पण पाठीवर हात ठेऊन कौतुकाची थाप देण्यासाठी बाबा तू हवा होतास अशी आर्त हाक तिने घालून ढसाढसा रडायला लागली. तिच्या जिद्दीची सर्वत्र चर्चा होऊ लागली आहे. तिला पुढचे शिक्षण मोठ्या हिमतीने घेणार आहे.

औसा (लातूर) : उद्या इंग्रजीचा पेपर म्हणून रात्रभर अभ्यास केला. पाच किलोमीटर अंतरावर असणाऱ्या परीक्षा केंद्रावर पोहोचण्यासाठी घाई घाईत निघालेल्या मुलीला वडिलांच्या अचानक मृत्यूने रोखले. जन्मदाता गेल्याचा धक्का बसलेल्या मुलीने बापाचा मृतदेह घरात ठेवून परीक्षा दिली आणि त्या विषयात तिला सत्तर गुण मिळाले. पेपर देऊन पित्यावर अंत्यसंस्कार करून पुढील पेपरही तिने मोठ्या हिमतीने दिले आणि यशाला गवसणी घातली. पण तिचे कौतुक करणारे पित्याचे शब्द हरवून गेल्याचे शल्य तिला नियतीने कायम दिले आहे.

ऑनलाइन शिक्षणाचा स्क्रीनटाईम वाढल्याने विद्यार्थ्यांचे वाढले हे आजार...   

औसा तालुक्यातील बोरगाव (नकुलेश्वर) येथील शीतल तुकाराम रोंगे ही भेटा येथील भारत विद्यालयात दहावीत शिकत होती. ९ मार्च २०२० रोजी तिचा इंग्रजी विषयाचा पेपर होता. त्याचा रात्रभर अभ्यास केल्यावर सकाळी लवकर उठून कामे आटोपून ती परीक्षेला निघाली. ती दारात आहे तो पर्यंतच तिचे वडील तुकाराम रोंगे यांना चक्कर अली आणि ते जमिनीवर कोसळले. काय होतंय हे कळण्याच्या आतच त्यांची प्राणज्योत मावळली. पित्याचे छत्र हरवलेल्या शितलला काय करावे कळत नव्हते. 

बेडूक अन् उंदरांवर चालते त्यांची उपजीविका  

घटकाभर पेपरला विसरलेल्या शितलला गावातील बालाजी साळुंके, नाथ पाटील यांनी धीर दिला आणि तिला परीक्षा देण्यासाठी सांगितले. गाडीवर तिला परीक्षा केंद्रात आणले. अश्रूंना वाट करीत शितलने पेपर दिला. घरी परतल्यावर वडिलांवर अंत्यसंस्कार करण्यात आले. नंतरचे पेपरही तिने मोठ्या हिमतीने दिले.

प्यार वाली लव्ह स्टोरी : उस्मानाबादचा 'पठ्ठया' प्रियसीसाठी चक्क पाकिस्तान बॉर्डरवर..! 

२९ जून रोजी निकाल लागला आणि इंग्रजी पेपरला तिला ७० गुण मिळाले तर ती सगळ्या विषयात ५६ टक्के गुण घेत उत्तीर्ण झाली. पण ती उत्तीर्ण झाल्यावर तिच्या डोक्यावरून हात फिरवत कौतुक करणारे पित्याचे बोल तिच्यासाठी कायम मुके झालेत ही भावना तिला अस्वस्थ करीत आहे. तिने दाखविलेल्या हिमतीची दाद पंचक्रोशीतून तिला दिली जात आहे.

संपादन-प्रताप अवचार


स्पष्ट, नेमक्या आणि विश्वासार्ह बातम्या वाचण्यासाठी 'सकाळ'चे मोबाईल अॅप डाऊनलोड करा
Web Title: SSC Exam Time father death but Stubbornly success