कार चालकाचे नियंत्रण सुटले अन् चार जणांनी गमावला जीव

महेंद्र पवार, कासा

मुंबई- अहमदाबाद राष्ट्रीय महामार्गावर महालक्ष्मीजवळ कार आणि लक्झरी बसचा भीषण अपघात झाला. या अपघातात चार जणांचा जागीच मृत्यू झाला. गुजरातहून मुंबईकडे जाणाऱ्या चालकाचे कारवरील नियंत्रण सुटल्याने हा अपघात झाला.

मंगळवारी पहाटे तीनच्या सुमारास गुजरातमधील बार्डोली येथील कार मुंबईच्या दिशेने जात होती. भरधाव कारवरील चालकाचे नियंत्रण सुटले आणि कार दुभाजकाला धडकली. यानंतर कार विरुद्ध दिशेने येणाऱ्या लक्झरी बसवर आदळली. कारमधील चार प्रवाशांचा घटनास्थळीच मृत्यू झाला. हा अपघात ऐवढा भीषण होता की कार चक्काचूर झाली होती. कारचा पत्रा कापून मृतदेह बाहेर काढावे लागले. अपघाताचे वृत्त समजताच महामार्ग पोलीस आणि कासा पोलीस घटनास्थळी पोहोचले. अपघातात लक्झरी बसमधील तीन प्रवासी जखमी झाले.

मृतांची नावे

मोहम्मद अब्दुल सलाम हापिसजी (वय 36), इब्राहिम दाऊद (वय 60), आशियाबेन कलेक्टर (वय 57) इस्माईल मोहम्मद देसाय (वय 42) अशी मृतांचे नावे आहेत.